Саха сирин үөрэнээччилэрэ Москваҕа Кириэмил харыйатыгар сырыттылар

Биэс сыллаах тохтобул кэнниттэн Москваҕа тыһыынчанан оҕолорго анаан Кириэмил харыйатын тэрээһинэ ыытылынна.

Кинилэр истэригэр Саха сириттэн 32 талааннаах үөрэнээччи баар, ол иһигэр туйгун үөрэнээччилэр, олимпиадалар, айар куонкурустар уонна успуорт күрэхтэрин кыайыылаахтара, ону тэҥэ  байыаннай дьайыы кыттааччыларын оҕолоро сырыттылар.

Санаттахх, Бүтүн Арассыыйатааҕы Кириэмил харыйата 2000 сылтан саҕалаан сыл аайы Судаарыстыбаннай Кириэмил дыбарыаһыгар ыытыллара. Бэрэсидьиэн көҕүлээһининэн Кириэмил харыйатын сөргүтүү — дойду бары муннуктарыттан уонна бырааттыы өрөспүүбүлүкэлэртэн оҕолору түмэр, сомоҕолуур, саҥа көлүөнэҕэ үгэстэри салгыыр улахан суолталаах түгэнинэн буолла.

Быйылгы бырааһынньык сыала-соруга — Арассыыйа араас муннуктарыттан, ол иһигэр Хотугу Кавказтан, Уһук Илинтэн, Сибииртэн, ону тэҥэ Приднестровьеттан, Абхазияттан уонна Соҕуруу Осетияттан оҕолору түмүү.

Саҥа дьыл иннинээҕи тэрээһиннэргэ уопсайа 5 тыһыынча кэриҥэ оҕо кытынна. Онно байыаннай дьайыыга өлбүт байыаннайдар оҕолоро, элбэх оҕолоох ыаллар оҕолоро, талааннаах эдэр артыыстар, күрэсчиттэр уонна уопсастыбаннай тэрилтэлэр актыбыыстара бааллар.

Тэрээһин официальнай тэрийээччитэ — «Бастакылар хамсааһыннара» (Движение первых) Арассыыйатааҕы оҕо уонна ыччат хамсааһына. «89 субъектан кэллилэр. Өссө биһиги доҕордуу дойдуларбытыттан — Абхазияттан, Приднестровьеттан, Соҕуруу Осетияттан оҕолор кэллилэр. Ураты түгэн, тулалыыр эйгэ хайдаҕын, оҕолор үөрүүлэрин көрүҥ», — диэн «Бастакылар хамсааһыннара» бырабылыанньатын бэрэссэдээтэлэ Артур Орлов бэлиэтээтэ.

Москваҕа аан бастаан кэлбит оҕолорго бырагыраама олус баай ис хоһоонноох. Оҕолор Европаҕа биир саамай улахан «Москвариум» океанариумугар сырыттылар, онно байҕал олохтоохторун туһунан билистилэр уонна уу аннынааҕы Саҥа дьыллааҕы харыйаны көрдүлэр. Оттон «Измайлово» гостиница комплексыгар оҕолорго «Бастакылар хамсааһыннара» тэрийбит оонньуулара буолан аастылар.

Кириэмил дыбарыаһыгар дьүһүйүү иннинэ оҕолор остуоруйа дьоруойдарын кытта хороводтаатылар, оонньоотулар, куонкурустарга кытыннылар. Киэһэ сүрүн түгэнинэн «Баҕа санаа курааннара» («Заветные куранты») испэктээкил буолла — бу ыра санаа, доҕордоһуу уонна мэһэйдэри туорааһын туһунан үтүө остуоруйа. Бу туһунан https://kremlevskaya-elka.mtuf.ru/ саайт иһитиннэрэр.