Саха сирин үлэһиттэрин аатыттан Владимир Путин уопсастыбаннай приемнайыгар этиилэрин киллэрдилэр

Саха сирин үлэһиттэрин аатыттан Владимир Путин уопсастыбаннай приемнайыгар этиилэрин тириэртилэр. Өрөспүүбүлүкэ идэлээх сойуустара үлэ эйгэтигэр уонна үлэһит быраабыгар сыһыаннаах этиилэри киллэрдилэр. Эрэгийиэннээҕи уопсастыбаннай приемнай волонтердара хандьыдаакка тиксэриэхтэрэ.

Идэлээх тэрилтэлэр киллэрбит этиилэрин кэккэлэригэр, холобур, быраас уонна учуутал курдук социальнай суолталаах бэрэстэбиитэллэр идэлэригэр сылайыыларын (профессиональное выгорание) аччатар туһунан этии баар – судаарыстыба таһымыгар Арассыыйатааҕы санаторийдарга уонна куруортарга доруобуйаларын бөҕөргөтүүнү, сынньатыыны мэктиэлээһин. Өссө биир этии педагогтар хамнастарын төлөбүрүн кытта сибээстээх. Идэлээх сойуустар бэрэстэбиитэллэрэ кинилэр хамнастара эрэгийиэн орто хамнаһыттан балтараа төгүл үрдүк буолуохтаах диэн этэллэр. Устудьуоннар истипиэндьийэлэрин тиийинэн олоруу алын кээмэйигэр диэри үрдэтэн, эбии көҕүлүүр ирдэнэрин ыйаллар.

Өрөспүүбүлүкэтээҕи идэлээх сойуустар олохтоох үлэ уратытыгар этиилэргэ туспа блогу анаатылар. Бу этиилэри барытын Владимир Путин Саха сиринээҕи уопсастыбаннай приемнайын волонтердарыгар докумуоҥҥа тиһэн киллэрдилэр. Саха сирин идэлээх сойуустарын аатыттан Владимир Путин уопсастыбаннай приемнайыгар араас былааннаах уонтан тахса этии киирбит.

Санатан эттэххэ, Владимир Путин уопсастыбаннай приемнайа 2023 сыл ахсынньытыттан үлэлиир. Волонтердар күннэтэ уонунан этиини ылаллар. Эрэгийиэн олохтоохторо Саха сирин олоҕун араас эйгэтин тупсарар этиилэрдээх, ону тэҥэ, чааһынай ис хоһоонноох ыйытыылаах кэлэллэр.