Саха сирин үс аэропортарыттан сөмөлүөт көтүүтүн тохтоттулар

Бүгүн, алтынньы 1 күнүгэр, Дьокуускай, Мииринэй уонна Полярнай аэропортарыттан 14 рейс оҥоһуллуута быстах кэмҥэ тохтотулунна. 

Саха сирин Тырааныспарга министиэристибэтэ иһитиннэрэринэн, кэккэ оройуоннарынан рейс оҥоһуллуутун бытаарыыта халлаан туруга мөлтөөһүнүн кытта сибээстээх.

«Кылгас кэмҥэ тохтотуллубут рейстэр пассажирдарыгар федеральнай авиационнай быраабыла ирдэбилигэр сөп түбэһиннэрэн бары өҥөлөр оҥоһулуннулар, ол иһигэр сөрүүн утах, итии аһылык, гостиницаҕа хонук, пассажирдарга аналлаах трансфер көрүллэр», — диэн иһитиннэрдэ биэдэмистибэ пресс-сулууспата. Рейстэр халлаан туругуттан көрөн сөргүтүллүөхтэрэ.