Саха сиринээҕи “Мин бастакы идэм” бырайыагы Арассыыйаҕа тарҕатыахтарын сөп

Саха сиригэр үлэлиир “Мин бастакы идэм” бырайыагы Арассыыйаҕа тарҕатыахха сөбүн туһунан дойду Үөрэҕириитин миниистирэ Сергей Кравцов эттэ.

Бу уонна да атын үөрэх эйгэтин эргийиэннээҕи бырайыактарын федеральнай биэдэмэстибэ салайааччыта Дьокуускай куораттааҕы Саха политиэхиньиичэскэй лиссиэйгэ сылдьар кэмигэр билиһиннэрдилэр. Маны Ил Дархан Айсен Николаев былырыын көҕүлээбитэ.

Улахан кылаас оҕолорун үлэ ырыынагар ирдэнэр хайысхаларга үөрэтэллэр – 10-11 кылаас үөрэнээччилэрэ оробуочай исписээлинэстэри ылалларыгар 20 000 солк. сэртипикээттэри биэрэллэр. Бырайыакка тыһыынчаттан тахса үөрэнээччи кытынна, үгүстэрэ номнуо бастакы идэлэрин ылбыттар. Ону тэҥэ, миниистиргэ «Карта юного жителя Якутии» уонна «Продвижение+» эрэгийиэн үөрэххэ саҥа бырайыактарын кэпсээтилэр.

Сергей Кравцов саҥа үөрэх дьылыттан үлэтэ былааннанар Саха политиэхиньиичэскэй лиссиэй эбии дьиэтин көрдө. Салҕааһын 326 оҕоҕо суоттанар, 30 толору кылаас киирэр.

Саҥа тутуу сүрүн уратыта – уопсай үөрэхтээһини уонна идэҕэ үөрэтээһини дьүөрэлээһин. Манна кластернай көрүүгэ олоҕурбут быраактыкаҕа туһаайыллар идэҕэ эрдэттэн бэлэмнээһин бырагыраамата үлэлиир. Сыала – оскуола үөрэнээччилэрин Саха сиригэр, Уһук Илиҥҥэ, Арктикаҕа ордук суолталаах инженернэй-тиэхиньиичэскэй уонна оробуочай идэлэргэ бэлэмнээһин.

Үөрэх эйгэтэ оҕолор идэҕэ да, айар дьоҕурдарын даҕаны сайыннарыыга кыах биэрэр. Үөрэнээччилэр элиэктирикэни, сантехниканы, массыына дьыалатын, информатиканы, гидропониканы үөрэтиэхтэрин сөп. Ону тэҥэ, робототехника, креативнай технология уонна хореография кэбиниэттэрэ көрүллэллэр.

Лиссиэй дириэктэрэ Надежда Тимофеева этэринэн, үөрэх аҕыс сүрүн хайысханан үлэлиир: «Сиртэн хостонор салаа», «Тырааныспар», «ОДьКХ уонна тутуу», «Энэргиэтикэ», «Мэдиссиинэ технологиялара», «Агротехнологиялар», «Креативнай индустрия» уонна «Сыыппара технологиялара».

Бу туһунан Ил Дархан уонна Бырабыыталыстыба пресс-сулууспата суруйар. Салгыы манна ааҕыҥ.