Саха сириттэн 121 км сиргэ муус уста турар

Иркускай уобаласка Өлүөнэ өрүскэ муус күүскэ бара турар. Өрөспүүбүлүкэ кыраныыссатыгар диэри 121 км хаалбыт.

Муус бара турар сирэ 229 км усталаах. Суукка иһигэр 109 км хамсаабыт.

Ленскэй оройуонугар өрүс эстиитэ ыам ыйын бастакы декадатыгар буолара күүтүллэр.

Өлүөнэ орто сүүрүгүнэн уу таһыма араастаан үрдүү турар. Витим-Пеледуй учаастагар муус ырбыылаабыт, Ленскэйтэн Солянкаҕа диэри уу муус үрдүгэр тахсыбыта көстөр.

Өлүөхүмэ улууһун иһинэн Өлүөхүмэ өрүһүгэр Дьиикимдэ – Куду Күөл учаастагар суукка иһигэр уу 5-тэн 17 см диэри үрдээбит, Дьиикимдэ гидропоһун таһыгар уу муус үрдүгэр тахсыбыт.

Алдан өрүһүгэр сууккаҕа уу 10-тан 50 см үрдээбит, муус турар, ырбыылаабыт. Мууһа хараарбыт, уу муус үрдүгэр баар.

Амма өрүһүгэр Амма сэл. таһынан уу суукка иһигэр 20 см эбиллибит, мууһа арахсан эрэр.

Бүлүү өрүһүгэр уу таһыма -4-тэн +8-ка диэри хамсыыр, муус турар.

Хотугу өрүстэр кыһыҥҥылыы тураллар, диэн YakutiaOpershtab тг-ханаал иһитиннэрэр.