Саха сириттэн 34-с төгүлүн байыаннай дьайыыга гуманитарнай көмөнү илдьибиттэр

Бэҕэһээ, атырдьах ыйын 19 күнүгэр, Дьокуускайтан байыастарга гуманитарнай көмө уочараттаах баартыйата барбыт. Бу байыаннай дьайыы ыытыллар сиригэр Саха сириттэн массыынанан барар 34-с сырыы буолар.

Ити туһунан бүгүн брифинг кэмигэр “Кыайыыга бииргэ!” өрөспүүбүлүкэтээҕи хамыыһыйа биир кэлим координационнай киинин салайааччытын солбуйааччы Анна Винокурова иһитиннэрдэ.

Кини этэринэн, бэҕэһээ Саха сирин волонтердара хомуйбут маҥнай утаа ирдэнэр маллаах уонна уһуннук харайыллар аһылыктаах гуманитарнай көмө массыыналара туруммуттар.

“Координационнай киин салайааччыта Георгий Куркутов Приморскай кыраайга командировкаҕа сылдьар. Кини байыаннай лииньийэ быысаһар сиригэр сорудаҕы толорор аармыйалар, биригээдэлэр, пуолкалар, дивизиялар хамаандалааччыларын кытта көрсөр. Көрсүһүү иитинэн байыаннайдар сайаапкалара, этиилэрэ хомуллуоҕа. Ону тэҥэ, Георгий Куркутов байыаннай госпиталларга уонна байыаннай чаастар бастайааннайдык тарҕанан олорор сирдэригэр биһиги байыастарбытын өйүүр Саха сириттэн сылдьар волонтердары кытта көрсүөҕэ”, – диэн Анна Винокурова иһитиннэрдэ. Бу туһунан Ил Дархан уонна Бырабыыталыстыба пресс-сулууспата суруйар.