Саха сириттэн алта устудьуон «Абилимпикс» национальнай чөмпүйэнээтин финалыгар кыттар

Саха сириттэн алта устудьуон Москваҕа алтынньы 30 күнүттэн сэтинньи 2 күнүгэр диэри ыытыллар инбэлииттэр уонна доруобуйаларынан хааччахтаах дьон ортотугар профессиональнай маастарыстыбаҕа «Абилимпикс» национальнай чөмпүйэнээтин финалыгар кытта бардылар, диэн ЯСИА суруйар.

Национальнай чөмпүйэнээккэ Саха сирин чиэһин алта кыттааччы көмүскүүр, кинилэр биэс компетенцияҕа күрэхтэһиэхтэрэ:

• Леонид Каженкин, Дьокуускайдааҕы сибээс уонна информационнай технологиялар кэллиэһин устудьуона («Пилота суох  аппарат оператора» компетенция);
• Ренат Иванов, улахан  кэһиллиилээх үөрэнээччилэргэ аналлаах өрөспүүбүлүкэтээҕи коррекционнай оскуола-интэринээт («Ресторан сервиһэ» компетенция);
• Макар Осипов, улахан кэһиллиилээх үөрэнээччилэргэ аналлаах өрөспүүбүлүкэтээҕи коррекционнай оскуола-интэринээт («Тиис технигэ» компетенция);
• Богдан Неустроев, Дьокуускайдааҕы мэдисиинэ кэллиэһин устудьуона («Тиис технигэ» компетенция);
• Нарыйаана Стручкова, Дьокуускайдааҕы мэдисиинэ кэллиэһин устудьуона («Визаж» компетенция);
• Александр Егоров, Дьүлэй үөрэнээччилэргэ аналлаах өрөспүүбүлүкэтээҕи оскуола-интэринээт («Маска уһаныы» компетенция).

Ону таһынан, финал чэрчитинэн «Модный стайл» күрэх ыытыллыаҕа, онно өрөспүүбүлүкэ аатыттан Саха политехническай лиссиэйин үөрэнээччитэ Алена Ан «Ай-Куо» кэлиэксийэтинэн  кыттыаҕа.