Саха сириттэн байыаннай дьайыы бэтэрээнэ «Абилимпикс» чөмпүйэнээтигэр кыттыаҕа

От ыйын 25-29 күннэригэр Казань куоракка анал байыаннай дьайыы кыттыылаахтарын ортолоругар идэҕэ маастарыстыбаҕа «Абилимпикс» чөмпүйэнээт аан бастакытын ыытыллыаҕа.

Саха сирин аатыттан Дмитрий Килигин кыттыаҕа. Кини «Массыыналары өрөмүөннээһин уонна хааччыйыы» компетенцияҕа киирсиэҕэ. Сулууспа кэнниттэн Дмитрий «Аҕа дойду көмүскээччилэрэ» пуонда көмөтүнэн «Сахаэнерго» АУо ситиһиилээхтик үлэҕэ киирбитэ, онно бүгүҥҥү күҥҥэ диэри үлэлии сылдьар.

Чөмпүйэнээккэ бэлэмнэнии В.М. Членов аатынан Дьокуускайдааҕы индустриальнай-педагогическай кэллиэс баазатыгар барар. Бэтэрээн уопуттаах настаабынньык салайыытынан дьарыктанар уонна үтүө түмүгү көрдөрөргө туруммут.

«Миэхэ бу саҥа ыҥырыы уонна бааһырыы кэнниттэн да ситиһиини оҥоруохха сөбүн дакаастыыр кыах», — диэн Дмитрий Килигин бэлиэтээтэ. Күрэхтэһиилэр национальнай чөмпүйэнээккэ сүүмэрдиир түһүмэҕинэн буолуохтара уонна дойду араас эрэгийиэннэриттэн бастыҥ бэрэстэбиитэллэрин мунньуохтара.

Кыттааччылар аныгы үлэ ырыынагын ирдэбиллэригэр эппиэттиир 15 ирдэбиллээх компетенциянан киирсиэхтэрэ. Олор истэригэр: бырамыысыланнай технологиялар, тутуу, аэронавигация уонна да атын салаалар киирэллэр, диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.