Саха сириттэн байыастарга уопсайа 150 тиэхиньикэ тиэрдиллибит

Саха сириттэн байыаннай дьайыыга кыттар байыастар араас  150 анал тиэхиньикэни туттулар. 200-тэн тахса туонна гуманитарнай көмө тиэрдилиннэ. Бу туһунан Донбасска көмө уонна өйөбүл Хотугулуу-Илиҥҥи пуондатын уонна «Кыайыыга бииргэ!» өрөспүүбүлүкэтээҕи ыстаап хамыыһыйатын  киинин салайааччыта Георгий Куркутов иһитиннэрдэ.

Кини этэринэн, ДНӨ сиригэр-уотугар баар Саха сирин тирэх пуунугар сотору кэминэн быйылгы бүтэһик тырааныспар тиийиэҕэ. Ол буойуттарга байыаннай сулууспалаахтар сайаапкаларынан аадырыстаах баһыылкалары, гуманитарнай көмөнү уонна массыыналары тиэрдиэҕэ. Ону таһынан, байыаннай госпиталлара баар Москва, Санкт-Петербург уонна Уһук Илин куораттарыгар «Якутия» уонна «Полярные авиалинии» авиахампаанньалар салгын аалларынан көмө тиэрдиитэ тэрилиннэ.

«Ааһан эрэр сылы түмүктээн эттэххэ, волонтерскай түмсүүлэри уонна байыаннай чаастары кытта ыкса сибээстээхтик үлэлээн, бары хайысханан үлэ  тохтообокко ыытылынна. Байыаннайдартан киирбит бары сайаапкалар уонна туһаайыылар толорулуннулар», – диэн Георгий Куркутов эттэ.