Саха сириттэн байыастарга 40 туонна ас-үөл ыытыллыбыт

«Идэһэ» аахсыйа иитинэн Саха сирин улуустарыгар эттэн, балыктан, үүттэн бэлэмнэниллибит ас-үөл арааһа бу күннэргэ улахан тиэхиньикэнэн байыаннай дьайыы буола турар сиригэр-уотугар ыытылынна.

Бу туһунан СӨ гражданскай көмүскэлин уонна нэһилиэнньэ олоҕор-дьаһаҕар куттал суох буолуутун хааччыйыыга миниистир Дмитрий Лепчиков эттэ. Кини таһаҕас билигин айаннаан иһэрин бэлиэтээтэ. Саҥа сылы көрсө тиэрдиллиэҕин иһитиннэрдэ.

«Ситэриилээх былаас органнарын, судаарыстыба тэрилтэлэрин көхтөөх өйөбүллэринэн, олохтоох ас-үөл байыаннай дьайыы буола турар сиригэр, Москва, Санкт-Петербург, Приморье уонна Хабаровскай госпиталларыгар баар байыаннай сулууспалаахтарга ыытыллар«, — диир миниистир.

«Патриотическай» ТОР федеральнай бырагыраама иитинэн ДНӨ баар Саха сирин тирэх пууннарыгар «Якт-Сокол» квадроцикллары тиэрдии салҕанан бара турарын бэлиэтиир.

«Чугастааҕы кэмҥэ «Тимир Ат» диэн манна оҥоһуллубут электроматасыыкыллары тиэрдии салҕаныа. Маны таһынан, өрөспүүбүлүкэ тэрилтэлэрэ уонна биэдэмистибэлэрэ тоҕус көлөнү биэрбиттэрэ. Сарсын байыаннай дьайыы буола турар сиригэр бу баартыйаттан үс массыына ыытыллыахтаах«, — диир Дмитрий Лепчиков.

Миниистир кэллиэгэлэригэр, СӨ Быыһыыр сулууспатын үлэһиттэригэр, өрөспүүбүлүкэ бары тэрилтэлэригэр Өлүөнэ эбэ уҥа кытылыгар таһаҕаһы уонна тиэхиньикэни харса суох тиһиктээхтик тиэрдиигэ, аҕалыыга үлэлэрин бэлиэтээтэ, махтанна.

СӨ Ил Дарханын уонна Бырабыыталыстыбатын пресс-сулууспата