Саха сириттэн байыастарга биир сыл иһигэр 136 массыынаны ыыппыттар

Саха сирэттэн былырыын анал байыаннай операция (СВО) кыттыылаахтарыгар 136 массыына ыытыллыбыт.

Бу туһунан «Вместе к Победе!» диэн эрэгийиэннээҕи суһал ыстаап координационнай киинин салайааччыта Георгий Куркутов иһитиннэрдэ.

Кини этэринэн, бу сыл тохсунньу саҥатыттан байыаннай дьайыы хонуутугар өссө 29 тырааныспары ыыппыттар. Салайааччы Аҕа дойдуну көмүскээччи күнүгэр байыастарга бэлэҕи тиэрдии хайдах ыытылларын туһунан иһитиннэрдэ.

«Бу күннэргэ Арассыыйа 10 куоратын байыаннай госпиталларыгар бырааһынньыктааҕы бородууктанан бэлэхтэр туттарылыннылар», — диэн координационнай киин салайааччыта иһитиннэрдэ.

Георгий Куркутов Саха сирин тирэх пууннарын үлэһиттэрэ ДНӨ, ЛНӨ уонна Курскай уобалас территорияларыгар олунньу 23 күнүгэр диэри 7000 бэлэхтэри барытын тутаралларыгар эрэнэрин биллэрдэ.