Саха сириттэн байыастарга өссө эбии үс тиэхиньикэни ыытыахтара

Бу нэдиэлэ бүтүүтэ Саха сириттэн байыастарга өссө үс тиэхиньикэни ыытары былаанныыллар. Бу туһунан нэдиэлэтээҕи брифиҥҥэ СӨ Гражданскай оборуонаҕа уонна нэһилиэнньэ олоҕун-дьаһаҕын куттала суох буолуутун хааччыйыыга миниистирин солбуйааччыта Яна Наумова иһитиннэрдэ.

Ону таһынан, өрөспүүбүлүкэ тэрилтэлэрэ, тэриллиилэрэ уонна нэһилиэнньэтэ хомуйбут гуманитарнай көмөтө уонна аадырыстаах баһыылкалара тиксэриллиэхтэрэ. Кини бэлиэтээбитинэн, ааспыт нэдиэлэҕэ СӨ Ил Дархана Айсен Николаев байыаннай дьайыыга ыытыллар сиригэр байыаннай сулууспалаахтарга гуманитарнай көмө уочараттаах баартыйатын, ону тэҥэ Саха сирин оҥорон таһаарааччылара оҥорбут «Сокол» квадроциклы, «Тимир Ат» электроматасыыкылы, пилота суох көтөр аппарааттары, радиоэлектроннай охсуһуу прибордарын бэйэтинэн тиксэрбитэ. Яна Наумова этэринэн, байыаннай дьайыы хонуутугар ыытыллар сиригэр Саха сирин тирэх пууннара байыаннайдарга гуманитарнай көмөнү уонна аадырыстаах баһыылкалары тиэрдиигэ тиһиктээх үлэни салгыыллар. «Ону таһынан кинилэр фроҥҥа тиксэриллибит Саха сиригэр оҥоһуллубут тиэхиньикэ туһунан байыаннай сулууспалаахтартан санааларын хомуйаллар», – диэн спикер эбэн эттэ.