Саха сириттэн байыастарга массыыналар холуонналара барыаҕа

Саха сириттэн байыаннай дьайыыга сылдьар байыастарга массыыналар холуонналара тиийиэҕэ. Бу туһунан СӨ гражданскай оборуонатын уонна нэһилиэнньэтин олоҕор-дьаһаҕар куттал суох буолуутун хааччыйар министиэристибэ миниистирэ Дмитрий Лепчиков нэдиэлэтээҕи брифинигэр иһитиннэрдэ.

-Бу күннэргэ фроҥҥа көмө быһыытынан өрөспүүбүлүкэ уонна федеральнай тэрилтэлэр көмөлөрүнэн ылыллыбыт массыыналары ыытыыга бэлэмнэнии бара турар.  Онон саҥа дьылга диэри байыаннай дьайыы буола турар сиригэр Дьокуускайтан массыыналар холуонналарын ыытары былаанныыбыт. Маны таһынан, Саха сирин байыастарыгар саҥа дьыллааҕы бородуукта нобуордарын Ил Дархан Айсен Николаев дьаһалынан тиэрдии үлэтэ ыытылла турар.

Маны сэргэ кини байыастарга таҥас-сап, сэп-сэбиргэл Саха сирин суһал ыстаабын сүбэтинэн ылылларын бэлиэтээтэ.

Брифинг түмүгэр Дмитрий Лепчиков «Аэрофлот» уонна «Якутия» авиахампаанньаларга фроҥҥа сылдьар байыастарга таһаҕаһы босхо тиэрдиитин махталын тиэртэ.