Саха сириттэн «Боотур» 31 этэрээтэ байыаннай дьайыы зонатыгар барда

«Боотур» үөрэтэр киин полигонугар тэтимнээх бэлэмнэнии кэнниттэн дойду патриоттара Аҕа дойдуларын көмүскүү байыаннай дьайыы зонатыгар көттүлэр. ЯСИА-ҕа иһитиннэрбиттэринэн, бу байыастар 31-с этэрээттэрэ.

Саха сирин Кылаабынай судаарыстыбаннай иниспиэктэрэ бойобуой сорудаҕы толоро сылдьан дронтан ыараханнык эмсэлээбит «Рыбак» диэн позывнойдаах байыаһы наҕараадалаата. Евгений Копренев Аҕа дойдуларын көмүскүү барааччыларга бэйэ-бэйэлэрин көрө-истэ сылдьалларыгар баҕарда.

Ыччат миниистирэ Петр Шамаев куруук сэрэхтээх буолалларыгар ыҥырда. «Саха сирэ — дьоруойдар дойдулара» каадыр бырагырааматын курсаана, төбөтүгэр бааһырбыт байыас Ришат Аюпов өстөөх аттыларыгар баарын умнубаттарыгар ыҥырда.

Бойобуой дьайыыга инбэлиит буолбут, ЧВК разведкалыыр подразделениетын байыаһа Назар Петров кыһыл көмүс быраабыланы ааттаата: дьиссипилиинэни кэһимэҥ, үстэн ордук буолан мустумаҥ уонна иирсимэҥ.
Айсен Николаев ыытар каадыр бырагырааматын курсаннара байыастарга кыайыы көтөллөөх эргиллэллэригэр уонна толору састаабынан «Саха сирэ — дьоруойдар дойдулара» кэккэтигэр киирэллэригэр ыҥырдылар.