Саха сириттэн буоста начаалынньыга «Модный приговор» биэриигэ кытынна

Арктика буостатын начаалынньыга Светлана Беркутова «Первый канал» ханаал «Модный приговор» биэриитигэр уһулунна. Кини үс саҥа уобараһы бэлэх тутта уонна биэрии ыытааччытыгар Лилия Рахха сахалыы бастыҥа бэлэхтээтэ. Бу туһунан Арассыыйа Буостатын пресс-сулууспата иһитиннэрдэ.

«Модный приговор» биэрии уһуллуутугар Светлана Беркутова алҕас түбэспит. Дьоруой кэпсииринэн, үлэтин кэннэ киэһэтин  «Модный приговор» биэриини көрбүт. Биэрии бүтүүтүгэр кыттыан баҕалаахтарга анаан QR-код көрдөрбүттэр. Кини тута коду аахтаран, анкетаны толорон, биэрии аадырыһыгар ыыппыт. Уһуллар кэмигэр киниттэн үлэтин туһунан хаста да  ыйыппыттар. Светлана килийиэннэрин иннилэригэр баар эппиэтинэһи, бары үлэһиттэр ону билэллэрин-көрөллөрүн, буоста социальнай миссиятын уонна дойдуга суолтатын, ону таһынан кэлэктиип иһигэр сыһыан хайдах тэриллэрин туһунан кэпсээбит.

Бырайыакка кыттыбытыгар Светланаҕа үс саҥа уобарас, түүппүлэ уонна суумка, хас да бижутерия кэмпилиэгэ хаалбыттар. Биир ыстааннаах көстүүмүнэн «Модный приговор» дьоруойа «Саха сирин сарсыардата» биэрии саҥа дьыллааҕы таһаарыытыгар кытынна.

Светлана Беркутова боустаҕа 20-тэн тахса сыл үлэлиир. Онтон үс сылын Арктикаҕа буостаны салайбыт, оттон биэс ый устата — Орто Өлүөнэтээҕи буостаны. Үлэтигэр кинини болҕомтолоох, аһыныгас уонна кыһамньылаах салайааччынан ааттыыллар,  ыарахан түгэҥҥэ өрүү көмөлөһөр диэн ахталлар.