Саха сириттэн сылдьар байыастарга 300-тэн тахса баһыылканы илдьэн биэрдилэр

Нэдиэлэ иһигэр 300-тэн тахса аадырыстаах баһыылканы Саха сирин тирэх пууннарын үлэһиттэрэ Курскай уобаласка уонна байыаннай дьайыы буола турар сиригэр сылдьар байыастарга илдьэн биэрдилэр, диэн  иһитиннэрдэ Юстас диэн ыҥырыллар ДНӨ, ЛНӨ, Курскай уонна Ростовскай уобаластарга баар өрөспүүбүлүкэ тирэх пууннарын сүрүн координатора.

Кини этэринэн, тирэх пууннар үлэһиттэрэ байыаннай чаастар баар сирдэригэр диэри 22-тэ сылдьыбыттар.

«2025 сыл саҕаланыаҕыттан ДНӨ-гэ баар Саха сирин тирэх пуунун өрөмүөннүүр бөлөҕө 10 «Якт-Сокол» квадроциклы уонна 3 массыынаны өрөмүөннээтилэр», — диир Юстас.

Өрөспүүбүлүкэ баһылыга Айсен Николаев соторутааҕыта тирэх пууннарын үлэһиттэригэр махталын биллэрбитэ.

“Биһиэхэ улахан сабыытыйанан Ил Дархан үлэбитин үрдүктүк сыаналаабыта буолла. Айсен Николаев махтал тыллара үлэһиттэр санааларын көтөҕөр уонна сэрииһиттэри эбии тэрийэн, хааччыйан биэрэр үлэбитигэр улахан суолталаах”, — диир өрөспүүбүлүкэ тирэх пууннарын сүрүн  координатора.