Саха сириттэн төрөппүт 10 кэмитиэтэ бэйэлэрин бырайыактарын олоххо киллэриигэ “Билии” уопсастыба бириэмийэтин ылыахтара

Бүтүн Арассыыйатааҕы төрөппүт кэмитиэтин IV мунньаҕар төрөппүттэр холбоһуктарын көҕүлүүр күөн күрэс иккис түмүгүн таһаардылар. Бэйэлэрин көҕүлээһиннэрин олоххо киллэрэргэ харчынан бириэмийэни Арассыыйа 85 эрэгийиэниттэн 1 015  төрөппүт кэмитиэтэ ылыаҕа, ол иһигэр Саха Өрөспүүбүлүкэтин 10 оскуолата.

Бастыҥ көҕүлээһини олоххо киллэриигэ бириис пуондата үс категориянан көрүллэр: 200-500 тыһ. солк., 500 тыһ. солк. – 1 мөл.солк. уонна 1 мөл. солк. – 2 мөл. солк. диэри.

2 мөл. солк. диэри категориялаах бириэмийэни Дьокуускай куорат 31-с нүөмэрдээх оскуолата “Семейный слёт “Орлятский круг” бырайыагы олоххо киллэриигэ ылыаҕа. Куорат таһынааҕа “Каландаришвили” доруобуйаны бөҕөргөтөр стационарнай лааҕыр баазатыгар дьиэ кэргэҥҥэ ырыа, үҥкүү бэстибээлин тэрийэр, тиэмэлэринэн маастар-кылаастары, баҕа өттүнэн кыттар аахсыйалары, күрэхтэһиилэри, исписэлиистэри – психологы, логопеды кытта көрсүһүүлэри ыытар, өрүөлчээннэр ырыаларын кумааҕынан хомуурунньугун таһаарар былааннаахтар. Өссө биир кыайыылааҕынан Нам улууһун 2-с нүөмэрдээх оскуолатын “Театральная осень” бырайыага таҕыста.

Бэйэлэрин бырайыактарын олоххо киллэриигэ 500 тыһ. солк. 1 мөл. солк. диэри  сууманы Горнай уонна Алдан улуустар сүүйдүлэр. Ол курдук, В.В.Филиппов аатынан Бэрдьигэстээх улуустааҕы гимназията “Эр хоһуун” эр санааланыы оскуолата” бырайыагын иитинэн, Аҕалар Сэбиэттэрэ аҕата суох хаалбыт оҕолор, анал байыаннай дьайыы кыттааччыларын дьиэ кэргэттэрин кытта “Синяя” айылҕа пааркатыгар нэдиэлэ устата барар былааннаахтар. Манна аҕалар оҕолору кутаа отторго, аһылык буһарарга, балыктыырга үөрэтиэхтэрэ, ойуурга быһаарса үөрэнэри кэпсиэхтэрэ, сатыы эспэдииссийэни тэрийиэхтэрэ.

Итини сэргэ, бу категорияҕа кыайыылааҕынан “Беседка” видеонан сэһэргээһиннээх Алдан оройуонун Аллараа Кураанах бөһүөлэгин гимназията таҕыста. Бу үөрэнээччилэргэ ыалы өрө тутуу өйдөбүлүн туһунан тиэрдэргэ сөптөөх көрүҥ. Хас биирдии таһаарыыга ыадьыттартан – гимназия дьиэ кэргэниттэн, кэлин Алдан улууһун ыалларыттан, педагогикаҕа уонна психологияҕа эспиэртэртэн ааптардар саамай суолталаах боппуруостарга хоруйдары ылыахтара, бэйэ-бэйэни өйдөһүү, уопсай баҕа санааны олоххо киллэрии, дьолу хайдах ситиһэр туһунан билиэхтэрэ.

Саха сириттэн өссө алта оскуола кыайыылааҕынан ааттаннылар – П.Х.Староватов аатынан Элгээйи, Хоро, М.К.Аммосов аатынан Хатырык, Е.Е.Пахомов аатынан Болугур, Нерюнгри  куорат алын анал (коррекционнай) оскуола – 3 нүөмэрдээх уһуйаан уонна 24-с нүөмэрдээх оскуолалара. Кинилэр 200-500 тыһ. солк. бириэмийэни ылыахтара.

Бу туһунан СӨ официальнай иһитиннэрэр порталыгар суруйаллар. Сиһилии манна ааҕыҥ.