Саха сириттэн төрүттээх Изот Кривошапкин Москва сүүмэрдэммит хамаандатыгар киирэн кыһыл көмүс мэтээли ылла

“Азия оҕолоро” норуоттар икки ардыларынааҕы оонньуулар остуол тиэнниһигэр иккилии буолан күрэхтэһиилэрэ түмүктэннэ. Саха сириттэн төрүттээх Москва сүүмэрдэммит хамаандатыгар киирэн кытта кэлбит Изот Кривошапкин Павел Романовскайы кытта кыһыл көмүс мэтээли ыллылар.  

40 сыл устата, ол иһигэр биэс төгүл “Азия оҕолоро” оонньууларга остуол тиэнниһигэр судьуйалаабыт, билигин бочуоттаах сынньалаҥҥа олорор Николай Киприянов күрэхтэһии туһунан санаатын бу курдук үллэстэр:

—  Урукку “Азия оҕолоро” оонньууларга Кытайтан, Соҕуруу Кореяттан, Хотугу Кореяттан, Индияттан лаппа күүстээх оҕолор кэлэн букатын тулуппат этилэр. Бу сырыыга Кытай сүүмэрдэммит хамаандата буолбакка, чөкө биир провинциятын оҕолоро кэлбиттэр. Быйыл Ураллааҕы федеральнай уокурук, Сибиирдээҕи федеральнай уокурук күүстээхтэр. Ону таһынан, Белоруссия Өрөспүүбүлүкэтин, Казахстан, Сирия, Лаос спортсменнара үчүгэйдэр эбит.

Саха сириттэн иккилии буолан оонньууга Вадимир Попов (Чурапчы), Ярослав Антонов (Дьокуускай) бэркэ оонньоотулар, финал чиэппэриттэн туораатылар. Казахстаны кытта оонньоон кыл мүччү кыайтардылар.

Уопсайынан, Саха сиригэр биирдиилээн оҕолор остуол тиэнниһигэр күүскэ сайдан эрэллэр. Холобур, Изот Кривошапкин Москваҕа Олимпийскай эрэл оскуолатыгар быйыл иккис сылын үөрэнэр. Изот уон мөлүйүөн нэһилиэнньэлээх Москва куоракка бэйэтин саастыылаахтарыгар бастакы нүөмэрдээх оонньооччу, Москваҕа үстэ бастаата, Арассыыйаҕа биирдиилээн бастыыр иһин күрэхтэһиигэ иккис буолбута, булкаас оонньууга Архангельскай кыыһын кытта чөмпүйүөннээбиттэрэ.

Амматтан сыдьааннаах Ньургун Наумов Оренбург куоракка төрөппүттэрин кытта баран олохсуйан олорон дьарыктанар. Ньургун Арассыыйаҕа бэйэтин саастыылаахтарыгар уон иһигэр кыранан киирбэккэ хаалбыта.

Айаал Румянцев бэйэтин саастыылаахтарыгар Арассыыйаҕа 16 күүстээх оонньооччу кэккэтигэр киирдэ.

Атын да Саха сирин оҕолоро сайдан эрэллэр, Уһук Илин уокурукка тиийэн миэстэлэһэллэр, Чурапчыттан Кривошапкин Вова, Изот чөмпүйүөннээн тураллар, хамаанданан эмиэ өрүү үс иһигэр сылдьаллара, — диэн санаатын үллэстэр. Саха сирин хамаандата остуол тиэнниһигэр иккилии буолан күрэхтэһиигэ 1996 с. уонна 2012 с. “Азия оҕолоро” оонньууларга үһүс миэстэлэри ылан тураллар диэн ахтар.

Изот Кривошапкин туһунан биһиги саайтпытыгар суруйан турабыт. Бу ыйыллыбыт сигэнэн ааҕыҥ.

Остуол тиэнниһигэр күрэхтэһии салгыы ыытыллар, көрөөччүлэри өссө чаҕылхай оонньуулар күүтэллэр.

Остуол тиэнниһигэр пааранан күрэхтэһии түмүгэ

Уолаттарга:

1 м. Кривошапкин И./Романовскай П. (Москва)

2 м. Варзаков А./Гордин И. (УФУо)

3 м.  Нурумов М./Ивахан С. (Казахстан)

3 м. Мацко Н./Петрашевскай А. (Белоруссия)

Кыргыттарга:

1 м. Селивонец М./Зайцева В.(Белоруссия)

2 м. Брегина С./Шайхуллина З. (УФУо)

3 м. Сладкова В./Койнова Е. (СФУо)

3 м. Хромова Е./Дощатова М. (Москва).