Саха сирин түөрт бөҕөһө Кыайыы күнүгэр аналлаах турнир финалыгар таҕыста

Саха сирин тустууктара Санкт-Петербург куоракка Улуу Кыайыы 80 сылыгар анаммыт «Кыайыы күнэ» Бүтүн Арассыыйатааҕы турнир финалистарынан буоллулар.

Саха сириттэн күрэхтэһиигэ барыта биэс бөҕөс кытынна, кинилэртэн түөрт спортсмен турнир финалыгар таҕыста. Турнирга Тыва, Дагестан, Хотугу Осетия — Алания, Москва, Новосибирск, Ленинград, Калининград, Брянскай, Оренбургскай уобаластар, Ставропольскай кыраай бэрэстэбиитэллэрэ, онтон да атын эрэгийиэн хамаандаларын бэрэстэбиитэллэрэ кыттыыны ыллылар.

57 кг диэри ыйааһыҥҥа Таатта улууһуттан Федор Постников киирсиэҕэ. Кини утарсааччытынан Москва бэрэстэбиитэлэ Рамазан Шахбанов буолар. Мэҥэ Хаҥалас улууһуттан Николай Сивцев бастакы миэстэ иһин Дагестантан 79 кг диэри ыйааһыҥҥа Гаджимурад Алихмаевы кытта киирсэр. Сунтаар оройуонуттан Ньургун Сергины (92 кг) утары финалга көбүөргэ дагестанец Ахмед Багавудинов тахсыаҕа. Оттон Максим Толмачев (97 кг) Москваттан тахсар Магомедарип Абдулхаликовы кытта киирсиэҕэ.