Саха сириттэн үс киһи – Владимир Путин итэҕэллээх дьоно

Владимир Путин итэҕэллээх дьонун статуһун туоһулуур докумуоннары Саха сирин тирэх пуунун волонтера Марина Бахилина, биллиилээх уопсастыбаннай диэйэтэл Валерий Лютай уонна артыыс Алексей Егоров ыллылар.

«Мин илиибэр бу тутан турар докумуоммунан киэн туттабын. Мин биир санаалаахтарбар дириҥ ытыктабылбын уонна кинилэр төрөөбүт Сахабыт сирин сайдарын туһугар оҥорор дьыалаларын иһин махталбын этиэхпин баҕарабын», — диэн Валерий Лютай телеграм-ханаалыгар суруйар.

Алексей Егоров эмиэ Владимир Путиҥҥа итэҕэллээх киһи буолбутун туоһулуур дастабырыанньаны ылан баран социальнай ситимнэргэ санаатын суруйда: «Мин Москваҕа бочуоттаах командировкабыттан төрөөбүт Сахам сиригэр төннөн кэллим уонна ытыктыыр табаарыстарбын Марина Константиновна Бахилинаны уонна Валерий Алексеевич Лютайы кытта көрүстүм. Биһиги үһүөн Модун Арассыыйаны инники күөҥҥэ сирдиир биһиги Бэрэсидьиэммитин өйүүргэ бэлэммит!».

Өссө эрдэ Марина Бахилина Бэрэсидьиэн бэлиитикэтин толору өйүүрүн туһунан хаста да этэн турардаах. «Мин Владимир Владимировиһы кытары тус көрсүһүүбэр кини күүстээх, кытаанах санаалаах киһи буоларын көрбүтүм, кини кутун-сүрүн ким да тоһутар кыаҕа суоҕун билэбин. Кини эрэ биһигини Кыайыыга сирдиир кыахтаах. Аҥардас байыаннай дьайыыга кыайыыга эрэ буолбакка, нацизмы утары кырдьык уонна сиэрдээх кыайыыга эрэлбит улахан», — диэн Марина Константиновна ааспыт сыл ахсынньытыгар Москваҕа буолбут Владимир Путины өйөөччүлэр сийиэстэригэр тыл эппитэ.

Киин быыбардыыр хамыыһыйа Владимир Путин 346 итэҕэллээх дьонун испииһэгин бигэргэппитэ. Онно култуура, ускуустуба, успуорт, биисинэс, мэдиссиинэ эйгэтин аатырбыт, биллэр-көстөр бэрэстэбиитэллэрэ киирбиттэрэ. Олор истэригэр актер Сергей Безруков уонна Владимир Машков, режиссер Никита Михалков, дирижер Юрий Башмет, тренер Ирина Винер уо. д. а. бааллар. Ону таһынан итэҕэллээх дьон статуһу Арассыыйа бары эрэгийиэннэрин ытыктанар бэрэстэбиитэллэрэ ылбыттара.

Санатан эттэххэ, Арассыыйа Бэрэсидьиэнин быыбара кулун тутар 15-17 күннэригэр 2024 сылга ыытыллыаҕа. Арассыыйа Киин быыбардыыр хамыыһыйата номнуо үс кандидаты – Леонид Слуцкайы, Владислав Давковы уонна Николай Харитоновы регистрациялаата.

#ВладимирПутин