Саха суруйааччыларын ротата хаҥыыр

Ыам ыйын 30 күнүгэр Москва куоракка буолбут Арассыыйа Суруйааччыларын сойууһун секретариатыгар Саха сириттэн төрүттээх нууччалыы суруйар поэт, байыаннай дьайыы кыттыылааҕа, инженердии сэриилэргэ рота хамандыыра, старшай лейтенант Анатолий Николаевич Храмов быһа Арассыыйа Суруйааччыларын сойууһугар чилиэнинэн ылылынна.

Сылтан ордук кэм устата буола турар байыаннай дьайыылар дойду үрдүнэн айар интеллигенция суолтатын, уран тыл күүһүн хаттаан сөргүттүлэр. Ол иһигэр суруйааччылар бөрүөнэн эрэ буолбакка саа-саадах тутан эмиэ аҕа дойдутун иннилэригэр ытык иэстэрин дьоһуннук толороллор. Холобура, баҕа өттүнэн барбыт Саха сирин Суруйааччыларын сойууһун иһинэн Эдэр литератордар сүбэлэрин чилиэнэ, Дьааҥыттан төрүттээх эдэр поэт Василий Рожин былырыын сэтинньи 16 күнүгэр Донецкайдааҕы норуот өрөспүүбүлүкэтин Нескучное диэн нэһилиэнньэлээх пуунун ылыыга хорсуннук охтубута. Оттон Арассыыйа  Суруйааччыларын сойууһун чилиэнэ, В.К. Арсеньев аатынан Уһук Илин бириэмийэ лауреата, прозаик Анатолий Слепцов эмчит быһыытынан Доннааҕы Ростов байыаннай госпиталыгар икки төгүл командировкаҕа баран үлэлээн кэлбитэ.

Анатолий Храмов буоллаҕына, литератураҕа байыаннай дьайыылар түмүктэринэн киирбитэ кэрэхсэбиллээх. Кини өссө оскуолаҕа уонна университекка үөрэнэр кэмигэр хоһоон суруйарга холоноро. Инники кирбиигэ уонна байыаннай госпитальга эмтэнэ сылдьан, бу дьарыгын сөргүппүтүн бойобуой доҕотторо биһирии көрсүбүттэрэ. Бааһыран төрөөбүт дойдутугар эргиллибит бойобуой эписиэр хоһооннорун СӨ култуураҕа уонна духуобунай сайдыыга министиэристибэтэ үбүлээн, «Дорогой жизни» диэн ааттаах, 80 хоһоону түмэр бастакы хомуурунньуга бу саас бэчээттэнэн таҕыста. Санатар буоллахха, кинигэ сүрэхтэниитэ ыам ыйын 11 күнүгэр М.К. Аммосов аатынан ХИФУ «Сэргэлээх уоттара» култуура киинигэр буолбута. Анатолий бу иннинэ Саха сирин Суруйааччыларын сойууһун ыҥырыытынан кулун тутар 17 күнүгэр буолбут «Мы с в вами, братья!» диэн байыаннай дьайыыларга анаммыт Арассыыйа аныгы поэттарын антологиятын сүрэхтэниитигэр кыттыбыта.

Эдэр поэты Арассыыйа Суруйааччыларын сойууһугар норуот суруйааччыта Николай Лугинов, Саха сирин Суруйааччыларын сойууһун бэрэссэдээтэлэ, норуот поэта Наталья Харлампьева, «Чолбон» сурунаал бас эрэдээктэрэ, поэт Гаврил Андросов уонна СӨ үтүөлээх суруналыыһа, прозаик Данил Макеев мэктиэлээтилэр. Анатолий Храмов айар холбоһукка киирбитин туоһулуур билиэти бэс ыйын 23 күнүгэр Москваҕа Арассыыйа  Суруйааччыларын сойууһун «Литературная гостиная» саалатыгар буолар кинигэтин иккис сүрэхтэниитин кэмигэр тутуоҕа.

Анатолий Николаевич Храмов Эдьигээн улууһугар төрөөбүтэ. Ийэтэ –эбэҥки, аҕата – нуучча, бэйэтин эбэҥкинэн ааҕынар, нууччалыы уонна сахалыы тэҥинэн билэр. Олоххо көхтөөх уол Эдьигээн  оскуолатыгар үөрэнэр кэмигэр байыаннай-патриоттуу кулуубу тэрийбитэ. ХИФУ омук тылын уонна эрэгийиэннэри үөрэтии институтун бүтэрбитэ. Устудьуоннуур сылларыгар «Молодежь Якутии» хаһыакка үлэлээн бас эрэдээктэргэ тиийэ үүммүтэ, Юнармия оҕо уонна ыччат хамсааһыныгар үлэлэспитэ. А.И. Прошляков аатынан Тюменнааҕы үрдүкү байыаннай-хамаандалыыр училищеҕа анал үөрэҕи баран сапер идэлэммитэ. Муус устар, алтынньы ыйдарга байыаннай эпэрээссийэҕэ рота хамандыырын быһыытынан кыттыбыта. Бойобуой наҕараадалардаах, ол иһигэр «Хорсунун иһин» мэтээллээх. Билигин инники кирбиигэ сылдьан ылбыт бааһын эмтэнэ сылдьар. Кэргэннээх, оҕолордоох.

Саха сирин Суруйааччылар сойууһун пресс-киинэ