«Саха сүөһүтэ» генопуонда хааһына ыанньыксыта 55 сааһын бэлиэтээтэ

СӨ «Саха сүөһүтэ» генопуонда хааһына тэрилтэ «Кылыс» отделениетын ыанньыксыта, биир тарбахха баттанар үлэһитэ Иван Иванович Петров 55 сааһын бэлиэтээтэ. Бу туһунан тэрилтэ бэйэтин телеграм-ханаалыгар иһитиннэрдэ. 

Кини 1986 сыллаахха оскуоланы бүтэрээт, «Оскуола, производство, үрдүк үөрэх» диэн оччотооҕу комсомольскай ыҥырыынан Одуну сопхуоска үлэлии тахсыбыта. Ынах сүөһүгэ сыстаҕас, үлэттэн толлон турбат, эппиэтинэстээх, сүрэхтээх, үлэһит уолу бэлиэтии көрөн, эһиилги сылыгар ыанньыксытынан ылаллар. Дьэ, онтон ыла Иван Иванович күн бүгүҥҥэ диэри ынах сүөһүттэн илиитин араарбакка үлэлээн-хамсаан кэллэ.

Олох укулаата уларыйан, сопхуостар ыһыллан, кооперативтар тэриллибиттэрэ. Иван Иванович төрөөбүт дойдутугар, Горнай улууһун Маҕарас бөһүөлэгэр «Одуну», «Искра», «Маай» кооперативтарга үлэлээбитэ. 2015 сыллаахха «Тускул» генопуонда тэрилтэтигэр киирэр. Бу кэмтэн ыла саха сүөһүтүн сүрэҕинэн-быарынан ылынан, таһаарыылаахтык үлэлии сылдьар.

Бииргэ үлэлиир дьоно бэлиэтииллэринэн, Иван Иванович сүрдээх ыраас туттунуулаах, кичэллээх үлэһит. Кырдьыга, даҕаны кини курдук дьон баар буолан, ханна да производство тохтообот буоллаҕа.

Быйыл сайын биир идэлээҕин Вера Романовна Лазерованы кытта Кылыс сайылыгар 48 ынаҕы ыыллар. Үүттэрин былаана – 9 тыһ.

Иван Иванович: «Саха ынахтара наһаа сымнаҕастар уонна өйдөөхтөр ээ. Киһи кинилэргэ наһаа ылларар, тардыһар эбит. Мин саамай сөбүлүүрүм – сайылыгым ээ. Эппиккэ дылы, кыһыны быһа ахтабын, онтон ыам ыйын ортото, көһөн кэлэбит. Уонна балаҕан ыйа бүтүөр диэри олоробут. Бу кэм устата мин дьэ, сайылыкпыттан ханна да барбаппын. Манна киһи дууһалыын, өйдүүн-санаалыын чэпчиир. Сайылыкпытыгар тэрилтэбит титиик, олорор дьиэлэри туттарбыта. Уот, куйаар ситимэ барыта баар. Онон киһи үөрэ-көтө үлэлиир бөҕө буоллаҕа дии».

Иван Петров элбэх саҥата суох, сэмэй киһи. Кини курдук сүөһү үлэтин ис сүрэҕиттэн ылынан үлэлиир дьон билигиҥҥи үйэҕэ ахсааннаах. Кини биһиги биир киэн туттар, холобур оҥостор үлэһиппит.

Олоҕуҥ саҥа кэрдиис кэмигэр эдэрдии эрчимҥин сүтэрбэккэ, үйэлээҕи үксэтэ, кэрэни кэрэхсии, саргылааҕы салайса сылдьаргар баҕарабыт. Үлэҥ-хамнаһыҥ харгыһы билбэккэ санааҥ хоту салаллан истин.