Саха талааннаах дьонун туһунан киинэ таҕыста

Балаҕан ыйын 16 күнүгэр Дьокуускайга «Мозг. Традиция. Мечта» документальнай киинэни көрдөрдүлэр. Бу ураты креативнай бырайыагы Култуурунай көҕүлээһиннэри өйүүр бэрэсидьиэн пуондата өйөөбүт.

Бу манна наука, аныгы технологиялар саха төрүт үгэстэрин, култууратын кытта дьүөрэлэһэллэрэ көстөр.
Документальнай киинэни режиссер Мила Кудряшова салайааччылаах хамаанда уһулбут. Кини — ХИФУ магистрантката, Потанин пуондатын стипендиатката, Санкт-Петербург куораттан сылдьар.
Киинэ дьоруойдара — скульптор Түмэн Хамаганов, этно ырыаһыт, эмчит Валентина Романова-Чыскыырай, кардиохирург Николай Боломатов, психофизиолог Александр Каплан, драматург Владислав Левочкин.
Аныгы кэмҥэ документальнай киинэ эрэгийиэн уратыларын туһунан кэпсиир үнүстүрүмүөн буолар диэн эттилэр.
Мила Кудряшова Саха сирин туһунан 7 киинэни уһулбут. Кини үлэлэрэ элбэх бириэмийэлэри ылбыттара.
Киинэни Москваҕа, Курскайга, Казаньҥа, Дьокуускайга устубуттар.
Мила Кудряшова киинэ лабораториятын университекка арыйан үлэлэтэр былааннааҕын кэпсээтэ. Киинэни устубут хамаандатын, дьоруойдарын кытта билиһиннэрдэ.
Опера, балет тыйаатырын дириэктэрэ Владислав Левочкин суруйбут »Сияющий камень» либреттота »Кыһыл көмүс маасканы» ылбыта. Балет муусукатын композитор Кирилл Герасимов суруйбута.

Култуура миниистирин солбуйааччы Марина Силина Милаҕа Саха сирин култууратын сайыннарыы иһин Бочуотунай грамотаны туттарда.
Сааланы толору мустубут көрөөччүлэр киинэни көрөн баран, ытыс тыаһынан эҕэрдэлээтилэр. Киинэ кэнниттэн кэпсэтии, ырытыһыы тэрилиннэ.