Саха таҥаһын баайарга 30-ча килэмиэтир уһуннаах сап барбыт

Олоҥхо ыһыаҕар саха таҥаһын көрүү күрэһэ ыытылла турар. 17-с үйэтээҕиттэн саҕалаан, аныгылыы саха таҥаһын эмиэ көрдөрдүлэр.

Тааттаттан кэлэ сылдьар Аргуновтар дьиэ кэргэн таҥастара дьон болҕомтотун тарта. Кинилэр сахалыы таҥастара бүтүннүү баайыы сабынан баайыллыбыт.
Бу таҥастарын эбэлэрэ, 74 саастаах Валентина Егоровна баайар эбит. Кини Таатта улууһун норуотун маастара, урут иистэнэр эбит. Билигин көрөрө мөлтүөҕүттэн, 2012 сылтан баайыынан дьарыктанар.

Бу көрөр таҥаскытын быйыл Олоҥхо ыһыаҕар анаан баайбыт. Бэйэтэ кэпсииринэн, таҥастары, ойуутун-мандарын түүлүгэр көрөр эбит. Биир былааччыйаны икки ый кэриҥэ баайар. Ийэлэрин былааччыйатыгар 9 килэмиэтир уһуннаах сап, аҕаларын хомуһуолугар — 3 км, кыргыттарыгар 3 км, 5 км, 9 км уһуннаах сап, барыта отучча килэмиэтиртэн тахса уһуннаах сап барбыт.

Баайарыгар оҕуруону тэҥҥэ кыбытан, дьүөрэлээн баайар эбит, оһуоорун-ойуутун барытын ааҕан-суоттаан, эбэн-сабан, быһыытын чочуйан таһаарар.
Аргуновтар маны таһынан, бу ыһыахха «Дьүрүһүй» ансаамбылынан хомус күрэһэр кыттыбыттар.

Видео: Ангелина Васильева