Саха тыйаатыра Чебоксарыга  бэстибээл үрдүк наҕараадатын ылла

Чувашия киин куоратыгар Чебоксарыга ССРС норуодунай артыыската Вера Кузьмина аатынан «Чĕкеç» («Ласточка») национальнай тыйаатырдар эрэгийиэннэр икки ардыларынааҕы II бэстибээллэригэр  Былатыан Ойуунускай аатынан Саха тыйаатыра бэстибээл үрдүк наҕараадатын ылла.

Саха тыйаатыра бэстибээлгэ Руслан Тараховскай туруоруутугар “Тулаайах оҕо” испэктээги көрдөрдө.

Бэстибээлгэ Калмыкия, Алтай, Саха сирэ, Марий Эл, Пермь кыраайын уонна  Чувашия айар кэлэктииптэрэ Арассыыйа национальнай тыйаатырдарын ускуустубатын көрдөрдүлэр. Дьүүллүүр сүбэҕэ тыйаатыр кириитиктэрэ, Станиславскай бириэмийэтин лауреаттара, режиссердар,  тыйаатыр институттарын доценнара уо.д.а. үлэлээтилэр.

Дьүүллүүр сүбэ биһиги артыыстарбыт маастарыстыбаларын үрдүктүк сыаналаан, кэккэ наҕараадалары туттарда.

-РФ үтүөлээх, СӨ норуодунай артыыһа Герасим Васильев “Тулаайах оҕо” испэктээккэ Бакамда оруолун иһин “Эр киһи иккис былааннаах бастыҥ оруола” бирииһинэн;

РФ үтүөлээх, СӨ норуодунай артыыската Изабелла Николаева Хатыаны оруолун иһин “Дьахтар иккис былааннаах бастыҥ оруола” бирииһинэн;

СӨ ускуустубатын үтүөлээх диэйэтэлэ Михаил Егоров “Бастыҥ сценография” бирииһинэн наҕараадаланнылар.

Санатан эттэххэ, «Чĕкеç» бэстибээлгэ Саха тыйаатыра “Улахан гостуруоллар” федеральнай бырайыак чэрчитинэн Поволжье куораттарыгар ыытылла турар “Хаарыан хампа кытыллар” гостуруолун кэмигэр кытынна.

Cаха тыйаатырын пресс-сулууспата