Саха тыйаатыра Ийэ сылын Аан Дархан махталынан түмүктээтэ

Ахсынньы 27 күнүгэр Саха тыйаатыра  өрөспүүбүлүкэҕэ биллэриллибит Ийэ сылын “Аан Дархан махталым Ийэҕэ” диэн хоһоон түһүлгэтинэн түмүктээтэ. Хоһоонунан дьүһүйүүнү Саха сирин  норуодунай артыыската, П.А. Ойуунускай аатынан судаарыстыбаннай бириэмийэ лауреата Зоя Багынанова көҕүлээн, артыыс, режиссер Семен Ченянов туруорда. Саха норуодунай суруйааччыта Иван Гоголев-Кындыл “Аан Дархан махталым” сонетын тула саха суруйааччыларын хоһоонноро киирдилэр.

Поэзия түһүлгэтигэр  Саха тыйаатырын  артыыстара саха норуодунай суруйааччыта Иван Гоголев-Кындыл “Аан Дархан махталым” сонеттара, саха бастакы поэтессата Варвара Потапова, саха норуодунай суруйааччыта Елена Слепцова-Куорсуннаах, саха норуодунай суруйааччыта Наталья Михалева-Сайа, саха биллиилээх поэтессалара Саргылаана Гольдерова-Саргы Куо, саха норуодунай  суруйаааччыта Дмитрий Наумов, суруйааччылар Семен Маисов, Афанасий Гуринов-Арчылан айымньыларыттан быһа тардыылары, поэтессалар Арылы Дуйдаах, Яна Байгожаева, ону сэргэ айар куттаах ааптардар Бурхалей Макаров, Николай Нутчин-Дьуур, Валентина Комиссарова-Күлүмүрэ, Домна Слепцова, Лариса Максимова хоһооннорун аахтылар.

РФ уонна СӨ үтүөлээх артыыһа  Петр Баснаев Варвара Окорокова “Саха литературатыгар ийэ уобараһа” ыстатыйатыттан Дмитрий Наумов “Сталин мэтээлэ” уонна Семен Маисов “Ийэм кэпсиир” айымньыларыттан быһа тардыыны, СӨ норуодунай суруйааччыта Сайа уонна Арчылан ийэлэригэр анаабыт хоһооннорун аахта. СӨ норуодунай артыыската, П.А.Ойуунускай аатынан судаарыстыбаннай бириэмийэ лауреата Зоя Багынанова Иван Гоголев-Кындыл “Айыы санаа араҥаччылаа” поэматыттан Ийэ алгыһын, оҕо сааһын дьүөгэлэрин Домна Слепцова “Кэпсэтии”, Лариса Максимова “Ийэм былаата” хоһооннорун,  Айталина Цыпандина саха бастакы поэтессатын Варвара Потапова “Үөскүү да, төрүү да илик…” хоһоонун, Айталина Лавернова поэтесса Яна Байгожаева “Үрдүк дьол”, СӨ үтүөлээх артыыската Маргарита  Борисова СӨ Ил Дарханын гранын көмөтүнэн тэриллибит “Айыы арчыта” куонкурус кыайыылааҕынан ааттаммыт Бурхалей Макаров “Ийэм чэйэ” хоһоонун уонна Николай Нутчин-Дьуур “Ийэҕит түннүгэ уоттааҕар ыалдьыттааҥ…” хоһооннорун долгуйа иһиттибит.

Ньургуйаана Шадрина Елена Слепцова-Куорсуннаах “Ийэм күүтэр”, СӨ үтүөлээх артыыската Ирина Никифорова саха биллиилээх поэтессата Саргы Куо “Амманы санаатахпына”, СӨ үтүөлээх артыыската Надежда Ушницкая Валентина Комиссарова-Күлүмүрэ “Кырдьаҕас ийэбэр”, “Ийэккэм сайынныын алтыһар”, СӨ үтүөлээх артыыската Елизавета  Потапова Иван Гоголев-Кындыл “Аан Дархан махталым” сонетын долгутуулаахтык ааҕан көрөөччү дууһатын таарыйдылар.

Иван Гоголев-Кындыл “Аан Дархан махталым” сонетын Сибиир биллиилээх поэтессата Нелли Закусина “Земной поклон” диэн ааттаммыт тылбааһын СӨ үтүөлээх артыыһа  Василий Борисов уонна Саха тыйаатырын  эдэр артыыстара Василий Белолюбскай, Айсен Лугинов нууччалыы ааҕан иһитиннэрдилэр.

Поэзия киэһэтин биир бэлиэ түгэнинэн Саха тыйаатырын артыыската Александра Сивцева поэтесса Арылы Дуйдаах “Дьикти сайын тоҕо эрэ…” хоһоонугар матыып айан,  гитараҕа доҕуһуоллаан ырыа сүрэхтээбитэ буолла.

Күн сирин көрдөрбүт Күн күбэй ийэлэргэ анаммыт поэзия киэһэтин Саха тыйаатырын  артыыстара биллиилээх суруналыыс, суруйааччы Степан Дадаскинов тылларыгар уонна Владимир Индигирскай мелодиятыгар дьон-сэргэ таптаан истэр “Ийээ, сыллаан ылыым дуу?” ырыанан түмүктээтилэр.

Надежда ИЛЬИНА.