Саха тыйаатыра саҥа сылга көрөөччүлэрин ханнык үлэлэринэн үөрдүөй?

Былатыан Ойуунускай аатынан Саха академическай тыйаатыра Арассыыйаҕа Уһуйааччы, онтон Саха сиригэр Үлэ сылларын чэрчитинэн бу сыллааҕы үлэтин былаанын торумнаата.

Саха тыйаатырын уус-уран уонна бырайыактыыр сэбиэтэ иһитиннэрбитинэн, 2023 сылга көрөөччүлэри саҥа, интэриэһинэй испэктээктэр күүтэллэр.
Саха Өрөспүүбүлүкэтин норуодунай суруйааччыта Василий Яковлев-Далан ”Тулаайах оҕотун” режиссер Руслан Тараховскай туруоруоҕа.
Режиссер Сергей Потапов саҥа үлэтин САССР, РСФСР, ССРС үтүөлээх тириэньэрэ Дмитрий Коркиҥҥа аныаҕа.
Былатыан Ойуунускай төрөөбүтэ 130 сылыгар анаан, режиссер Роман Дорофеев улуу суруйааччы олоҕун бүтэһик күннэрин туһунан ахтыыга олоҕурбут испэктээгэ көрөөччү дьүүлүгэр тахсыаҕа.
Николай Неустроев «Кукаакы кулубата”, саха остуоруйаларынан квест-испэктээк уо.д.а. сонун бырайыактар бу сылга былааннаннылар.
Маны таһынан Саха тыйаатыра улуустарынан гостуруоллуур үтүө үгэһэ салҕанар. Тыйаатыр айар кэлэктиибэ мантан саас саҥа тутуллубут Култуура дьиэлэрдээх Нам, Бүлүү, Үөһээ Бүлүү, Сунтаар улуустарыгар улахан испэктээктэрин көрдөрөр кыахтаныаҕа.
Атын дойдулары кытары хардарыта гостуруоллары тэрийии чэрчитинэн, Саха тыйаатыра Бурятияҕа бэйэтин испэктээктэрин билиһиннэриэҕэ, хас да араас таһымнаах бэстибээллэргэ кыттыаҕа.