Саха тыйаатырыгар — саҥа туруоруу

Былатыан Ойуунускай аатынан Саха академическай тыйаатыра  бу айар сылга ураты суолталаах премьераны бэлэмниир. 

Өрөспүүбүлүкэ  биллиилээх судаарыстыбаннай уонна бэлитиичэскэй диэйэтэлэ, Саха сирин чулуу уола Гавриил Иосифович Чиряев олоҕун уонна үлэтин сырдатар соруктаах «КӨНӨ СУОЛТАН ТУОРААБАККА» диэн испэктээк көрөөччү дьүүлүгэр тахсыаҕа диэн тыйаатыр телеграм-ханаалыгар иһитиннэрдилэр.

Испэктээк Саха народнай поэта Наталья Харлампьева айымньытынан туруоҕа. Бүгүн тыйаатыр  артыыстара ааптары кытта сирэй көрсөн, айымньы сүрүн идиэйэтин, уобарастары арыйыы уратыларын туһунан кэпсэттилэр. Артыыстар ааптары кытта сүбэлэһэн, Гавриил Чиряев курдук бөдөҥ салайааччы олоҕун сыанаҕа хайдах тиэрдэр туһунан санаа үллэһиннилэр. Саҥа туруоруу Саха сирин устуоруйатыгар уонна судаарыстыбаннаһын сайдыытыгар анаммыт суолталаах түгэн буолара күүтүллэр.