Саха тыйаатырын салалтата суруналыыстары кытары көрүстэ

Олунньу  1 күнүгэр Былатыан Ойуунускай аатынан  Саха тыйаатырын салалтата өрөспүүбүлүкэ хаһыаттарын, сурунаалларын суруналыыстарын кытары көрүстэ. Кэпсэтии чуолаан пандемия кэнниттэн Саха тыйаатырын уонна сонуну киэҥник тарҕатар сириэстибэлэри кытары ситимнээх  үлэни чөлүгэр түһэрии уонна инники былааннар тустарынан буолла.

Тыйаатыр дириэктэрэ Петр Макаров билигин, аныгы олох сиэринэн,  социальнай ситимнэри кытары үлэ ыытылларын, ол эрээри, хаһыат сирэйдэригэр  тыйаатыр үлэтэ-хамнаһа суруллан, үйэлэргэ хаалара хайаан да наадатын санатта. “Суруллубут суоруллубат” дииллэринии, тыйаатыр уонна айар дьон үлэтэ-хамнаһа, устуоруйата, артыыстар  ситиһиилэрэ сиһилии кэпсэнэн, ааҕааччылар билиэхтэрин-көрүөхтэрин баҕаралларын туһунан эттэ.

Петр Макаров тыйаатыр ааспыт сылы ситиһиилээхтик түмүктээбитин, тыйаатыр устуоруйатыгар хаһан да буолбатах улахан гостуруоллар тэриллибиттэрин  туһунан эттэ. Ол курдук, Саха Өрөспүүбүлүкэтин 100 сылынан Саха тыйаатыра Санкт-Петербурга Александринскай уонна  Москваҕа Арассыыйа Малай тыйаатырдарыгар гостуруолларын туһунан киэн тутта кэпсээтэ.

2023 сылга көрөөччүлэри саҥа, интэриэһинэй испэктээктэр күүтэллэр. Саха Өрөспүүбүлүкэтин норуодунай суруйааччыта Василий Яковлев-Далан  «Тулаайах оҕотун” режиссер Руслан Тараховскай туруоруоҕа. Режиссер Сергей Потапов саҥа үлэтин САССР, РСФСР, ССРС үтүөлээх тириэньэрэ Дмитрий Коркиҥҥа аныаҕа. Онтон да сонун бырайыактар бу сылга былааннаналлар.

Маны таһынан,  Саха тыйаатыра улуустарынан гостуруоллуур үтүө үгэһэ салҕанар. Тыйаатыр айар кэлэктиибэ мантан саас саҥа тутуллубут Култуура дьиэлэрдээх Нам, Бүлүү, Үөһээ Бүлүү, Сунтаар улуустарыгар “Саха тыйаатырын күннэрин” ыытан,  “Тыгын Дархан”, “Төлкө” уонна “Суоһалдьыйа Толбонноох” курдук көрөөччүлэр биһирэбиллэрин ылбыт улахан үлэлэрин  көрдөрөр кыахтаныаҕа. Атын дойдулары кытары хардарыта гостуруоллар тэриллиэхтэрэ.

Ону сэргэ,  быйылгы сезон сабыллыыта Саха тыйаатырын алта устуудьуйата үөрэнэн, артыыс идэтин ылбыт М.Щепкин аатынан училище 235 сылын уонна бу училищены 2002 сыллаахха бүтэрбиттэр 20 сыллаах бэлиэ күннэригэр ананыаҕа. Бу тэрээһиннэр от ыйын 1 күнүттэн саҕаланыахтара.

Суруналыыстар тыйаатыры кытары үлэҕэ баҕа санааларын аһаҕастык этэн, истиҥ кэпсэтии буолла. Ол иһигэр, сурутуу кэмигэр ыытыллар аахсыйаларга кыттыһалларыгар, тыйаатыр бэтэрээннэригэр сурутуу ыытан бэлэх оҥороллоругар уод.а. баҕардылар.

Тыйаатыр дириэктэрин солбуйааччы Михаил Егоров өрөспүүбүлүкэ хаһыаттарын  кытары ситимнээхтик үлэлээн, хаһыаттар уонна сурунааллар көрөөччүгэ далаһа буолалларыгар  баҕа санаатын тириэртэ.

(Тыйаатыр пресс-сулууспатын хаартыскалара)