Саха тыйаатырын сыанатыгар «Кыра тыгын» испэктээк туруоҕа

Аан дойдутааҕы Оҕо көмүскэлин күнүнэн бэс ыйын 1-2 күннэригэр Саха тыйаатырын сыанатыгар кырачаан көрөөччүлэргэ уонна кинилэр төрөппүттэригэр анаан Антуан де Сент Экзюпери дириҥ ис хоһоонноох “Кыра тыгын” (“Маленький принц”) остуоруйата туруоҕа. Режиссерунан Павел Ченянов буолла.

Остуоруйа Нора Галь нууччалыы тылбааһыттан Саха норуодунай суруйааччыта Елена Слепцова-Куорсуннаах сахалыы саҥардыбыт “Кыра тыгын” кинигэтигэр олоҕурар.

Оруоллары Саха тыйаатырын иһинэн үлэлиир “Талаан” оҕо театральнай устуудьуйатын иитиллээччилэрэ уонна Саха тыйаатырын эдэр артыыстара толороллор.
Бырайыак салайааччыларынан СӨ үтүөлээх артыыһа Ирина Никифорова уонна Айталина Цыпандина-Винокурова буолаллар.

Испэктээк кэнниттэн артыыстар оҕолорго, кырачаан көрөөччүлэргэ анаан бириистээх оонньуулары оонньотуохтара, хаартыскаҕа түһүөхтэрэ.