Саха тыла ситим эйгэтигэр: сайдыыга саҥа хардыы

«Саха сирэ» уонна «Эдэр саас» сайтар – сахалыы сонуннары тарҕатар сайтар ортолоругар бастыҥнарынан биллэллэр.

Саха тыла өрөспүүбүлүкэ тутаах медиа-бөлөхтөрүн көмөтүнэн цифровой эйгэҕэ салгыы сайдар. «Сахамедиа» холдинг Sakha-sire.ru, Edersaas.ru уонна Kerdee.ru агрегатор-көрдөөччү интэриниэт ресурсалара сахалыы тылынан ааҕааччыларга тиийимтиэ иһитиннэриини, култуурунай бырайыактары уонна саҥа технологиялары тиэрдэллэр.

Үйэ историялаах «Саха сирэ» хаһыат эрэдээксийэтэ хаһыаты бэчээттиирин таһынан икки саайты: Sakha-sire.ru уонна Edersaas.ru таһаарар. Хаһыат кылаабынай эрэдээктэрэ Александр Тарасов иһитиннэрбитинэн, Sakha-sire.ru саайт ыйдааҕы көрүүтэ 1,6 мөлүйүөҥҥэ, оттон Edersaas.ru 1,1 мөлүйүөҥҥэ тиийбит. LiveInternet рейтинигэр Sakha-sire.ru саайт бэһис, оттон Edersaas.ru алтыс миэстэҕэ тураллар. Бу ааҕааччылар ортолоругар итэҕэл үрдүгүн уонна хаһыат өрөспүүбүлүкэ судаарыстыбаннай тылынан сонуннарын тарҕатар сүрүн источнигын быһыытынан суолталааҕын бигэргэтэр.

Edersaas.ru платформаҕа саха норуотун култууратын, историятын, үгэһин туһунан матырыйааллар бэчээттэнэллэр. Ааҕааччылар ортолоругар кэпсээннэр уонна тургутуктар улахан сэҥээриини ылаллар. Манна омук быһыытынан уратыбытын, үгэстэрбитин уонна аныгы кэм тиэмэлэрин хабан араас контеннары оҥороллор.

Сахалыы тыллаах контены интэрниэт тарҕатар сыаллаах 2022 сыл олунньутугар Kerdee.ru агрегатор-көрдөөччү оҥоһуллубута. Бу агрегатор-көрдөөччү сүрүн соругунан бары сахалыы тыллаах саайтар рейтиннэрин үрдэтии буолар, ол кинилэр көрдүүр систиэмэлэргэ таһымын үрдэтэр. Агрегатор араас источниктартан тугу көрдүүргүнэн хомуйар уонна систиэмэлиир, онон өрөспүүбүлүкэ судаарыстыбаннай тылынан сонуннары ылыыны судургутутар.

«Платоформа саха тыллаах цифрововй медиа эйгэни тарҕатар, онон интэриниэти туһанааччыларга сөптөөх уонна көдьүүстээх матырыйаалы  буларга көмөлөһөр», —  диэтэ «Сахамедиа» холдинг генеральный дириэктэрэ Виктор Колесов.

Агрегатор сүрүн сирэйигэр бары сахалыы тыллаах интэриниэт медиа сонуннары туруорар, оттон тиэмэнэн көрдөөһүнү онно сыһыаннаах тылы суруйан көрдөтөҕүн. Платформа биир сүрүн үчүгэй өрүтүнэн матырыйаал аан бастаан тахсыбыт  источниктарыгар сигэнэн батыһыннаран тиэрдэр. Ол барыта сахалыы тыллаах сайтары кэҥэтэргэ көмөлөһөр.

Ону тэҥэ Kerdee.ru агрегаторга цифровой эйгэҕэ туһаныллар онлайн-тылдьыттар, караоке уонна да атын интерактивнай матырыйааллар бааллар. Манна эрэ сахалыы ураты сканвордары онлайн таайыахха сөп.