Саха тылын, литэрэтиирэтин, култууратын учууталларын сийиэһигэр атын эрэгийиэннэр кыттыахтара

Сэтинньи 25-26 күннэригэр саха тылын, литэрэтиирэтин, култууратын учууталларын өрөспүүбүлүкэтээҕи III сийиэһэ ыытыллаары турар. Сийиэскэ сүүрбэччэ былаһаакканан 500-чэкэ дэлэгээт кыттара былааннанар. Итинтэн 200-тэн тахса — учуутал.  Атын эрэгийиэннэртэн эмиэ кэлэллэрин күүтэллэр.

Тэрээһиҥҥэ бэлэмнэнии хаамыытын бырабыыталыстыба бэрэссэдээтэлэ Сергей Местников салайааччылаах тэрийэр хамыыһыйа мунньаҕар көрдүлэр.

“Сийиэс ийэ тылы сайыннарарга ыйар-кэрдэр суол буоларынан суолтата улахан. Бары улуустартан кытта кэлэр сийиэс дэлэгээттэрин – төрөөбүт тыл учууталларын, үөрэх тэрилтэлэрин үлэһиттэрин, управление начаалынньыктарын, муниципальнай тэриллиилэр баһылыктарын кытта бүтэһик сийиэс кэнниттэн туох үлэ барбытын, төрөөбүт тылы чөл хаалларарга туох үлэ ыытыллыбытын, эбии төһө кылаас аһыллыбытын уонна биллэн турар, бүгүҥҥү күҥҥэ туох ыарахаттар баалларын ырытыһыахпыт. Инники көлүөнэ төрөөбүт тылын билэрин, саҥарарын уонна оҕоҕо чахчы төрөөбүт тыла буоларын туһугар салгыы туох үлэ ирдэнэрин кэпсэтиэхпит.

Атын национальнай өрөспүүбүлүкэлэртэн — Башкортостантан, Татарстантан, Бурятияттан ыалдьыттары ыҥырдыбыт. Кинилэр төрөөбүт тылы үөрэтиигэ уопуттарын истиэхпит, бэйэбит даҕаны холобурбутун көрдөрүөхпүт” – диэн бырабыыталыстыба бэрэссэдээтэлэ Сергей Местников эттэ.

Сийиэс икки күн ыытыллыаҕа. Сэтинньи 25 күнүгэр, күн бастакы аҥаарыгар, Саха тыйаатырыгар сүрүн мунньах былааннанар. Салгыы сэтинньи 25-26 күннэригэр, сүүрбэччэ түһүлгэнэн учууталлар, исписэлиистэр, учуонайдар, уопсастыбанньыктар, төрөппүттэр түмсэн “төгүрүк остуолларга”, сиэссийэлэргэ, бастыҥ учууталлар маастар-кылаастарыгар, сэминээрдэргэ, санаа атастаһыыларыгар кыттыахтара.

Үөрэх уонна билим миниистирин бастакы солбуйааччы Ньургун Павлов: “Үһүс сийиэс кэнсиэпсийэтин барыла, саха тылын бастыҥ учууталларын харчынан өйүүр бириэмийэ аныыр балаһыанньа оҥоһулунна, сийиэскэ ыытыллар тэрээһиннэр былааннара таҥылынна, кыттааччылар, ыҥырыылаах ыалдьыттар испииһэктэрэ бэлэмнэннэ.

Иккис сийиэскэ үүнэр көлүөнэни саха тылынан үөрэтэргэ, иитэргэ өрөспүүбүлүкэҕэ туох кыһалҕалар баалларын ырытыспыт эбит буоллахпытына, үһүс сийиэс уратыта диэн, атын эрэгийиэннэр хайдах үлэлии олороллорун, кинилэр сонун ньымаларын үөрэтиэхпит” – диэн бэлэмнэнии хаамыытын туһунан билиһиннэрэригэр эттэ.

Сийиэс түмүгүнэн биир кэлим быһаарыыны ылынан, сыал-сорук туруоран, ол хайысханы олоххо киллэрэргэ, төрөөбүт тыл чөл туруктаах хааларыгар, үүнэр көлүөнэҕэ тиийэригэр ситимнээх үлэ барыаҕа. Уопсайынан, быйылгы тэрээһин бэйэ ыырыттан тахсан, атыттар холобурдарын көрөн, онно тирэҕирэн салгыы сайдар саҕахтары толкуйдуурга саҥа кыаҕы биэрииһи. Санатан эттэххэ, саха тылын, литэрэтиирэтин, култууратын учууталларын сийиэһэ резолюцияҕа киирбитинэн, үс сылга биирдэ ыытыллар.