Саха тылын, литэрэтиирэтин учуутала Клара Ксенофонтова авторскай сэминээрин ыытта

СӨ үөрэҕириитин туйгуна, СӨ мэтэдиис учуутала, “Саха Азия оҕолоро” пуонда стипендиата, Дьокуускай куорат 12-с нүөмэрдээх оскуолаҕа саха тылын, литэрэтиирэтин учуутала Клара Ксенофонтова бүгүн “Айар кутум аартыгынан” авторскай сэминээрин ыытта.

Бу күн ыраахтан-чугастан мустубут ыалдьыттар, учууталлар, үөрэх үлэһиттэрэ, барыта 39 киһи быйыл үлэҕэ киирбит куорат 12-с нүөмэрдээх оскуолатыгар экскурсияҕа сырыттылар. Итиэннэ “Таптыыбын төрөөбүт дойдубун” хомуурунньукка киирбит хоһооннорунан “Хоһоон хонуута” тэрээһини, “Саха суруйааччылара — оҕолорго” биллэрэр-көрдөрөр былакааты уруокка туһаныы сэминээрин көрдүлэр. Учууталлар, төрөппүттэр, үөрэнээччилэр кыттыылаах “Бэргэн этиилэр-2” хомуурунньугунан блиц-турнир, санаа атастаһыыта, “Айар” кинигэ кыһатын атыыта буолла.

“Учуутал сыла эрэ диэн буолбатах, ханнык да кэмҥэ учуутал идэтэ таабырыны, кистэлэҥи, ситэ этиллибэти кытта сыһыаннаах курдук… Биир тиэмэни, биир саастаах оҕолорго биир тэҥ дьупулуомнаах учууталлар үөрэтэллэр да, көрдөрүүлэрэ баҕарбыттарын да иһин майгыннаспат, араас буолар. Маны биһиги учуутал суола диэххэйиҥ. Дьэ ити учуутал суола хайдаҕа үүнэр көлүөнэҕэ дьэҥкэ көстөр уонна бииртэн-биирэ биһирэтэр буолар быһыылаах. Клара Борисовна оннук суоллаах учуутал эбит диэн санаа бүгүн ыытыллыбыт тэрээһиҥҥэ хас да түгэҥҥэ көһүннэ. Бииринэн, кини оскуолаҕа уонна оскуола саастаах оҕолорго сөп гына кинигэ хомуйан оҥорорго үөрүйэхтэнэн, идэтийэн үгүс дьоҥҥо биһирэтэр уонна бэркэ биллэр. Бу күн кини икки кинигэтин: “Бэргэн этиилэр 2” уонна “Таптыыбын төрөөбүт дойдубун” хомуурунньук туһунан кэпсэтистибит, санаа үллэһиннибит. Иккис өттүттэн, Клара Борисовна оҕолоро куорат, өрөспүүбүлүкэ таһымыгар биллэр-көстөр олимпиадниктар, хоһоонньуттар. Ону оҕолор бэйэлэрэ учууталларын үтүө сыһыанынан, оттон иитэр үлэҕэ дириэктэри солбуйааччы оскуоланы бүтэрбиттэргэ тиийэ ол сыһыан сойботун, уҕараабатын бигэргэттилэр. Биһиги мустан олорооччулар онтон олус үөрдүбүт. Үсүһүнэн, бу учуутал уруога улахан сыраттан, толкуйтан, систиэмэттэн тахсыбыт олус чочуллубут үлэ эбит диэн санаатыбыт. Санаатыбыт эрэ. Клара Борисовна бэйэтэ ол сатабылын анаан кэпсээбэтэ, инньэ гынан, ситэ этиллибэтэх кистэлэҥ күлүүһүн биһиги инникитин истиэхпит этэ диэн иһитиннэрдибит да, санаатыбыт да. Сэминээр диэн этэ буоллаҕа дии. Ол иһин бу суруйуум саҕаланыытыгар эппиппин хатылыыбын: учуутал барахсан үлэтэ – ситэ этиллибэт Кэрэҕэ айан быһыылаах диэн. Оннук да буолуохтаах быһыылаах”, — диэн Дьокуускай куорат “Айыы Кыһата” гимназия учуутала, Арассыыйа суруйааччыларын сойууһун чилиэнэ Рустам Каженкин бэркэ бэлиэтээн суруйар.

Уопсайынан, куорат 12-с нүөмэрдээх оскуолата оҕону сахалыы тыыҥҥа иитиини уонна ахсааны төрөппүтү кытта бииргэ дьүөрэлээн үөрэтэр оскуолалартан биирдэстэринэн буолар. Клара Ксенофонтова манна үгүс сыратын уурар.

“Бүгүн 12-с оскуолага Клара Борисовна авторскай сэминээрэ бэркэ ааста. Оскуола учууталлара, төрөппүттэр, оҕолор бары бииргэ түмсэн олус таһаарыылаахтык, дириҥник хорутан үлэлии сылдьаргытын көрөн астынным. Үгүс үлэни үмүрү тутан, бииртэн биир бэрт кэрэхсэбиллээх кинигэлэри таһаарбытыҥ барыбытыгар олус туһалаах. Инникитин даҕаны өссө үрдүк ситиһиилэри, махталлаах үөрэнээччилэри, төрөппүттэри!”, — диэн Дьокуускай куораттааҕы Саха политиэхиньиичэскэй оскуола учуутала Наталья Леонтьева санаатын үллэстэр.

Бу күн Клара Борисовнаҕа үгүс махтал, алгыс тыллара этилиннилэр. Ол курдук, Саха политиэхиньиичэскэй оскуола учуутала Майя Осипова: “Клара Борисовна, айымньылаах үлэҥ үрдүктүк сыаналаммытынан эҕэрдэлиибин! Кэрэ, холку киһилии сыһыаҥҥынан биһигини инникигэ угуйарыҥ кэрэхсэбиллээх! Эн үтүө холобургунан иитэн-такайан таһаарбыт ыччаттарыҥ элбии турдуннар! Чэгиэн буол!”, — диэн этэр.

Сэминээр ааптара оҕону иитэрин-үөрэтэрин таһынан бэйэтэ кинигэ суруйар, “Айар” кинигэ кыһатын кытта ыкса ситимнээхтик үлэлиир. “Сэминээриҥ этэҥҥэ ааспытынан! Өссө да үрдүк ситиһии сиэттистин, саҥаттан саҥа идиэйэлэр, бырайыактар олоххо киирдиннэр, айар-тутар талааныҥ аартыга бу курдук арыллан, сайдан, тупсан иһиэхтин”, — диэн кинигэ кыһатын үлэһиттэрэ алгыс тылларын аныыллар.