Саха тылын, литэрэтиирэтин уонна култууратын учууталларын өрөспүүбүлүкэтээҕи III сийиэһин көрсө

Бу дьыл сэтинньи 25-26 күннэригэр саха тылын, литэрэтиирэтин уонна култууратын учууталларын өрөспүүбүлүкэтээҕи III сийиэһэ ыытыллара былааннанар. Бырабыыталыстыба бэрэссэдээтэлин солбуйааччы Сергей Местников салайыытынан, бу күннэргэ сийиэһин көрсө элбэх кэпсэтии, чопчулаһыы, сүрүн соруктары торумнааһын буола турар.

Ыытыллаары турар өрөспүүбүлүкэ сийиэһигэр улуустартан, Дьокуускай куораттан 458 кэриҥэ дэлэгээт уонна итини таһынан, Арассыыйа араас эрэгийиэннэриттэн ыалдьыттар, тыл эспиэрдэрэ кыттыыны ылаллара былааннанар. Ол курдук, «Төрөөбүт тыл уонна төрөөбүт литэрэтиирэ бастыҥ учуутала-2024» Бүтүн Арассыыйатааҕы күөн күрэс кыайыылааҕа, Улан-Удэ куораттан бурятскай национальнай лиссиэй-интэринээт алын сүһүөх уонна бурят тылын учуутала Раданжапова Светлана Владимировна, Калмыкия Өрөспүүбүлүкэтиттэн «Төрөөбүт тыл уонна төрөөбүт литэрэтиирэ бастыҥ учуутала-2024» Бүтүн Арассыыйатааҕы күөн күрэс призера, Элиста куорат 24-с нүөмэрдээх уһуйаанын эбии үөрэхтээһинин педагога Балакаева Екатерина Николаевна кэлиэхтэрэ.

Сийиэс дэлэгээттэрэ саха тылын, литэрэтиирэтин уонна култууратын үүнэр көлүөнэҕэ, кэлэр кэскилгэ тириэрдэр, сайыннарар туһугар этиилэрин киллэриэхтэрэ. Ол курдук сүрүн көтөҕүллэр боппуруостарынан буолуохтара:

Сахалыы иитии-үөрэтии билимин сайыннарыы, сахалыы тылынан иитэр-үөрэтэр усулуобуйаны үөрэх эйгэтигэр тэрийии, идэҕэ бэлэмниир үөрэх тэрилтэлэригэр саха тылын, литэрэтиирэтин уонна култууратын үөрэтэр усулуобуйаны тэрийии, тупсарыы, Олоҥхо педагогиката, аныгы ыалга оҕону сахалыы иитии, доруобуйаларыгар хааччахтаах оҕолорго төрөөбүт тылы үөрэтии уратыта, сахалыы үөрэтии хаачыстыбатын кэтээн көрүү, үрдэтии; куорат эйгэтигэр саха тылын үөрэтии кыһалҕатын уонна инникитин туһунан, саха тылын, литэрэтиирэтин кэпсэтии тылын олимпиадатын туһунан, онтон да атын тыын боппуруостарга, тоҕоостоох тиэмэлэргэ төгүрүк остуоллар, санаа атастаһыылар, иһитиннэриилэр буолуохтара, быыстапкалар тэриллиэхтэрэ. Дэлэгээттэр уонна сийиэс тэрийээччилэрэ “Саха” НКИХ былаһааккаларыгар кыттыахтара.

Сийиэс сүрүн мунньаҕа сэтинньи 25 күнүгэр П.А. Ойуунускай аатынан Саха академическай тыйаатырыгар буолуоҕа. Сүрүн мунньах киэҥ хабааннаахтык ааһыаҕа. «Сахам тыла үүнэ-сайда турдун!» диэн ааттаах быыстапка үлэлиэ. Саха тылын уонна литэрэтиирэтин учуобунньуктарын, көмө босуобуйаларын, оҕоҕо аналлаах сахалыы кинигэлэрин, методическай литэрэтиирэлэрин быыстапкалара буолуоҕа. «Саха Өрөспүүбүлүкэтигэр судаарыстыбаннай уонна дьиҥ таһымнаах тыллары харыстааһын уонна сайыннарыы» Саха Өрөспүүбүлүкэтин судаарыстыбаннай бырагырааматын чэрчитинэн, анал бырайыактары сырдатыы буолуоҕа. Туспа бырагырааманан Олонхо дэкээдэтин тэрээһиннэрэ ыытыллыахтара.

С.Н.Донской-II аатынан Үөрэҕи сайыннарар уонна идэ таһымын үрдэтэр үнүстүүт дьиэтигэр «УЧУУТАЛ МАСТАРЫСКЫАЙА» диэн саха тылын уонна литэрэтиирэтин, култууратын бастыҥ учууталларын, иитээччилэрин маастар-кылаастара тэриллиэхтэрэ.

Сийиэс дэлэгээттэригэр анаан тэрийээччилэр умсугутуулаах бырагырааманы оҥордулар. Ол курдук, сүрүн үлэни таһынан култуурунай уонна сынньалаҥ тэрээһиннэр (түмэлгэ сылдьыы, сахалыы киинэ, испэктээк көрүү) былааннанан тураллар. С.Н.Донской-II аатынан Үөрэҕи сайыннарар уонна идэ таһымын үрдэтэр үнүстүүт үлэһиттэрэ идэ таһымын үрдэтэр куурустары ыытыахтара.

Киэҥ куйаарга киирэн саха тылын, литэрэтиирэтин уонна култууратын учууталларын III сийиэһин сигэтинэн, Сийиэс сүрүн бырагырааматын билсиэххэ сөп: https://съездучителей14.рф/

Дойду Бэрэсидьиэнэ Владимир Путин: “Үгэстэр, ураты төрүт тыллар – Арассыыйа тугунан да сыаналаммат баайа, Хотугу, Сибиир уонна Уһук Илин норуоттарын култуурата ураты, чаҕылхай миэстэни ылар” диэн этэн турар. Санатар буоллахха, судаарыстыба баһылыга Арассыыйа норуоттарын төрөөбүт тылларын сыллата балаҕан ыйын 8 күнүгэр бэлиэтиир туһунан ыйаахха илии баттаабыта. Бу туһунан Үөрэх уонна билим министиэристибэтин саайтыгар суруйаллар.