Саха тылын учууталларын II сийиэһин түмүгүнэн резолюция дьүүллэһилиннэ

Ил Түмэн бастакы вице-спикерэ, «СӨ тылларын туһунан» сокуон 30 сылыгар аналлаах тэрээһиннэри бэлэмнээһин уонна ыытыы хамыыһыйатын бэрэссэдээтэлэ Александр Жирков ааспыт сыл бүтүүтэ буолан ааспыт Саха тылын, литэрэтиирэтин уонна култууратын учууталларын II сийиэһин түмүгүнэн ылыллыбыт резолюция бырайыагын дьүүллэһэр мунньаҕы ыытта.

Александр Жирков мунньахха сийиэс дэлэгээттэрэ туруорбут сытыы уонна билиҥҥи кэмҥэ сөптөөх боппуруостарын санатта уонна ылыллар резолюция инники үлэбит сүнньүнэн буолуохтаах диэн бэлиэтээтэ. Кини бу докумуон бүтэһик вариана тупсарылынна эрээри, өссө да ситэ илик диэтэ.

СӨ үөрэҕин уонна наукатын миниистирэ Ирина Любимова иһитиннэрбитинэн, сийиэс чэрчитинэн, сэттэ сүрүн хайысханан боппуруостар көрүллүбүттэрэ, ол иһигэр үөрэхтээһин саҥардыллар усулуобуйатыгар төрөөбүт тылы, литэрэтиирэни уонна култуураны үөрэтии, Арассыыйаҕа биир кэлим үөрэхтээһин куйаарыгар этнокультурнай эйгэ, үөрэхтээһиҥҥэ аныгы цифровой эйгэ, оҕону, ыччаты төрөөбүт тылынан үөрэтэргэ, үөрэтэр бырагыраамалары, үөрэх кинигэлэрин, үөрэтэр босуобуйалары ырытан оҥоруу боппуруостара, о.д.а киирдилэр.

Итини таһынан бырайыакка саха тылын, литэрэтиирэтин уонна култууратын учууталларын өрөспүүбүлүкэтээҕи сийиэһин үс сылга биирдэ ыытар туһунан итиэннэ «СӨ төрөөбүт тыл учууталын статуһун туһунан» өрөспүүбүлүкэтээҕи сокуону ырытан оҥорон, ылыныы туһунан этии киирбитэ.

Үөрэх миниистирэ сүрүн дакылаатын кэнниттэн мунньах кыттыылаахтара төрөөбүт тылга сыһыаннаах боппуруостары дьүүллэстилэр. Чуолаан, учуутал уонна учуутал статуһун туһунан сокуоннар туох уратылаахтарын чопчуластылар. Итини таһынан «Кулаковскай Картата» бырайыак олоххо киириитигэр кэккэ боппуруостар үөскээтилэр, үөрэхтээһин тэрилтэлэригэр этнокультурнай эйгэни тэрийэргэ ыытыллар дьаһаллар үбүлээһиннэрин ыйыттылар. «Кулаковскай Картата» эмиэ «Пушкин Картатын» курдук, ыччакка туһалаах, көдьүүстээх буоларын курдук оҥоһуллуохтааҕа ыйылынна.

Александр Жирков мунньах түмүгүн таһаарарыгар: «Резолюция өссө да ситэриллэн оҥоһуллуон наада, сийиэскэ дьүүллэһиллибит, сорох боппуруостар киирбэтэхтэр. Чуолаан, чааһынай оскуолаларга төрөөбүт тылынан үөрэтии уонна саҥаны киллэрии үтүө холобурдара тоҕо киирбэтилэр? Итиннэ биирдии боппуруоһунан үбүлээһинтэн саҕалаан, хайдах тарҕаныахтааҕар тиийэ ырытыллан оҥоһуллуохтааҕа. Оччоҕо эрэ кыһалҕаны быһаарыы суоллара көстүөхтэрэ. Төрөөбүт тылы харыстааһын, сайыннарыы соруктарын аҥардастыы үөрэх тэрилтэтигэр эрэ соҥнооһун сатаммат. Бастатан туран, төрөппүттэр уонна атын даҕаны институттар итиннэ үлэлэһиэхтээхтэр. II сийиэс сыалынан өрөспүүбүлүкэ норуоттарын тылларын, литэрэтиирэтин, төрөөбүт тылы үөрэтиини тупсарыыны, кыһалҕатын быһаарыыны, научнай-педагогическай холбоһуктары, саха тылын, литературатын преподавателлэрин, учууталларын, төрөппүттэри, уопсастыбаннаһы, холбуур биир сүрүнү булуохтаахпыт», – диэтэ.