Саха тылын учууталларын сийиэһигэр Амма дэлэгээссийэтэ кыттар

Бүгүн киин куоракка саха тылын уонна литэрэтиирэтин учууталларын үһүс сийиэһигэр  өрөспүүбүлүкэ бары оскуолаларыттан бэрт элбэх учуутал, уопсастыбаннас бэрэстэбиитэллэрэ, төрөппүттэр кыттыыны ылаллар.

Кинилэр ортолоругар Амма улууһуттан 21 киһилээх  дэлэгээссийэ баар.  Улуустааҕы үөрэх управлениетын салайааччытын солбуйааччы Семен Шадрин улуус учууталлара сүрүннээн араас былаһааккаларга кыттан, сиэксийэлэргэ көхтөөхтүк кыттар соруктаахтарын туһунан билиһиннэрдэ.

«Туох сонун сүүрээннэри киллэрбиккитин холобурдуоххун сөбүй?» диэн ыйытыыга үөрэх управлениетын салайааччыта бары оскуолаларга, эбии үөрэхтээһин тэрилтэлэригэр кэбиниэттэр урукку сылларга нууччалыы тылынан суруллар эбит буоллахтарына, бастакы сийиэс кэнниттэн сахалыы суруллар буолбуттарын, сахалыы тыыннаммыттарын бэлиэтээтэ.

Сарсын Амма дэлэгээссийэтэ араас хайысхалаах сиэксийэлэринэн хайдыһан, сийиэс тэрээһиннэригэр көхтөөхтүк кыттыаҕа.