Саха тылынан «Барҕарыы» пуонда өрөспүүбүлүкэтээҕи  II кэмпириэнсийэтэ буолуоҕа

Кулун тутар 18 күнүгэр Дьокуускай куоракка «Барҕарыы» пуонда 35 сыллаах үбүлүөйдээх тэрээһиннэрин чэрчитинэн, сахалыы тылынан «Барҕарыы» өрөспүүбүлүкэтээҕи II кэмпириэнсийэ буолуоҕа.

Кэмпириэнсийэ чинчийэр үлэ нөҥүө оҕо айар, ырытар, анаарар дьоҕурун, сахалыы саҥарар, толкуйдуур сатабылын сайыннарар сыаллаах ыытыллар.

Тэрээһиҥҥэ 15 улуустан уонна Дьокуускай куораттан улуустааҕы, куораттааҕы түһүмэх кыайыылаахтара, барыта 400-тэн тахса оҕо кыттыаҕа. Билим бары хайысхатынан 18 сиэксийэ үлэлиэҕэ. Оҕолор дакылааттарын билим эйгэтиттэн 57 эспиэр сыаналыаҕа.

Пуонда генеральнай дириэктэрэ Афанасий Постниковтан бэстибээл былырыыҥҥытааҕар туох уратылааҕын туһунан ыйыппыпытыгар: “Быйыл “Барҕарыы” пуонда тэриллибитэ 35 сыла. Үбүлүөйдээх сыл иитинэн кэккэ тэрээһиннэри ыытабыт, кэмпириэнсийэ ити чэрчитинэн барар. Былырыыҥҥытааҕар кыттааччы ахсаана эбиллэн, 450-ча оҕоҕо тиийдэ. Оҕо ахсаана элбээбитинэн биир сиэксиэйэни эбэн, хайысхаларын кэҥэтэн биэрдибит.

Кыайыылаах оҕолору Дьокуускайга туспа лааҕырга түмэн сынньатабыт, өрөспүүбүлүкэ биллэр-көстөр, сатабыллаах, саха тылын баһылаабыт дьонун кытта көрүһүннэрээччибит, дьарыктааччыбыт. Былырыын артыыстары, учуонайдары кытта көрсөн оҕолор билиилэрэ-көрүүлэрэ лаппа кэҥээбитэ. Быйыл 140-ча оҕону эмиэ түмэр былааннаахпыт.

Итини таһынан, былырыын киирбит этиинэнэ, оҕолору арыаллаан кэлбит салайааччыларга Үөрэҕи сайыннарар уонна идэ таһымын үрдэтэр институт, Төрөөбүт тыл сайдыытын киинин кытта кыттыһан, оҕолору сахалыы иитиигэ, күн бүгүн тирээн турар боппуруостары быһаарарга туспа сэминээр ыытыахпыт.

Аны наҕараадалааһыны көннөрү ыыппакка, үөрэнээччилэри ситиһиилээх дьону кытта көрүһүннэрэн форсайт-сиэссийэ оҥоруохпут. Манна уһулуччулаах спортсмен Василий Егоров, “Көмүлүөк” хампаанньа генеральнай дириэктэрэ Ольга Григорьева, артыыстар кэлэн тус санааларын, көрүүлэрин үллэстиэхтэрэ” – диэн этэр.

Бырагыраамата

Кулун тутар 18 күнэ:

Буолар сирэ: Ойуунускай уул. 37 нүөмэрдээх дьиэтэ (Өрөспүүбүлүкэтээҕи лиссиэй-интэринээт)

08:30 – Бэлиэтэнии

09:30 – Түһүлгэни арыйыы

09:45 – Эспиэр тэрээһин мунньаҕа (аактабай саала)

10:00 – Хайысханан үлэ

13:00 – Эбиэт

14:00 – Хайысханан үлэ

17:00 – Хайысханан түмүк таһаарыы, наҕараадалааһын

17:30 – Доҕордоһуу киэһэтэ, оонньуу, үҥкүү.

Итини таһынан, кулун тутар 18 күнүгэр 10 ч. учууталларга анаан «Оҕону иитэр-үөрэтэр сахалыы эйгэни тэрийии» сэминээр буолуоҕа (Ойуунускай уул. 37 өрөспүүбүлүкэтээҕи лиссиэй-интэринээт аактабай саалата).

ФОРСАЙТ-СИЭССИЙЭ

Кулун тутар 19 күнэ

Буолар сирэ: Орджоникидзе уул. 1 нүөмэрдээх дьиэтэ (Саха академическай тыйаатыр).

10:00 «Барҕарыы» кэмпириэнсийэ Кылаан кыайыылаахтарын эҕэрдэлээһин.

10:30-13:00 Үөрэх, култуура, успуорт, урбаан эйгэтиттэн биллиилээх дьон, блогердар, артыыстар кыттыылаах форсайт-сессия.