Саха уола Ян Рожин «Якутия» ледокол хапытаанын көмөлөһөөччүтэ

Жатайдааҕы техникумҥа  олус кэрэхсэбиллээх көрсүһүү буолла. Техникум устудьуоннарыгар  “Якутия” мууһу солуур атомнай  суудуна хапытаанын иккис көмөлөһөөччүтэ Ян Рожин ыалдьыттаата.

Көрсүһүүгэ кини сөбүлүүр идэтин, аан дойдуну кытта тыыннаах алтыһыы туһунан, хас биирдии күҥҥэ быһаарыныыны ылыныы төһө эппиэтинэстээҕин уо.д.а. кэпсэттилэр.

Ян Александрович кэпсээбитинэн, кини Нам улууһун  2-с Хомустааҕар төрөөбүт уонна улааппыт. Чуолаан манна, өрүс, тайҕа уонна хотугу халлаан тулалыыр сиригэр улаатан моряк буолар ыра санааламмыта. Муоралар, хараабыллар уонна ыраах да ыраах айаннар тустарынан кэпсээннэри олус сэргээн истэрэ. Дьэ, уонна олоҕун флокка сулууспалааһыҥҥа аныырга бигэ санааламмыта.

Ян көрсүһүүгэ аан дойду биир саамай сүҥкэн суудунатын олоҕуттан араас устуоруйаны, Арктика тыйыс усулуобуйатыгар навигация уонна  быыһыыр эпэрээссийэлэр тустарынан,  хас да миэтэрэлээх мууһу солоон суол тэлэр хамаанда сорҕотунан буолар хайдаҕын туһунан кэпсээтэ.

Онтон устудьуоннар карьераны, үөрэҕи, аныгы технологиялары уонна тыйыс усулуобуйаҕа үлэлииргэ ханнык тус хаачыстыбалар баар буолуохтаахтарын интэриэһиргээтилэр. Кинилэр бу күн элбэх билиини эрэ сомсубатылар, ону сэргэ улахан дуоһуйууну ыллылар.

Көрсүһүү биир ураты түгэнинэн Ян Рожин устудьуоннарга гитаранан ыллаабыта буолла.

Маннык көрсүһүүлэр  уопуту атастаһыы эрэ буолбакка, көлүөнэлэри ситимнииргэ итиэннэ  ыра санааны  толорорго далаһанан  буолаллар.

Биһиги Ян Александровичка аһаҕас, истиҥ кэпсээнин уонна хас биирдиибитигэр дуоһуйууну бэлэхтээбитин иһин махтанныбыт.

Жатайдааҕы техникум пресс-сулууспата