Саха уустара Москваны сөхтөрдүлэр

Саха сирин уустара Москваҕа ыытыллыбыт «Клинок – үгэс уонна аныгы кэм» норуоттар икки ардыларынааҕы быыстапка сүрүн дьоруойдара буоллулар. Кинилэр Саха сиригэр үйэлэр тухары харыстанан кэлбит ураты ньыманы – тимири уулларан ылыы технологиятын – дьон-сэргэ дьүүлүгэр таһаардылар.

Уустар үс күн иһигэр  Амма, Өлүөнэ уонна Буотама өрүстэртэн дьиҥнээх саха уруудатын аҕалан, көрөөччүлэр харахтарын далыгар 15 киилэ тимири уулларан таһаардылар. Аатырбыт саха быһахтарын көрдөрдүлэр. Хомус уонна кырыымпа доҕуһуолунан дьиҥнээх Саха сирин эйгэтин тэрийдилэр.

«Быыстапкаҕа анаан, былыргы дьиҥнээх ньыманы көрдөрөр туһуттан, Саха сириттэн аналлаах урууда аҕалбыппыт», — диэн уус Роман Алексеев кэпсиир.

«Клинок» быыстапката – дойду биир саамай бөдөҥ уус-уран түһүлгэтэ буолар. Саха сирин уустара бу быыстапкаҕа үгэс быһыытынан өрүү бочуоттаах миэстэни ылаллар.