«Саха волонтердара» байыаннай дьайыы кыттыылаахтарыгар көмөлөрө салҕанар

«Саха волонтердара» хамсааһын чилиэннэрэ бааһырбыт байыастарга ас астаан, мал-сал атыылаһан илдьэллэрин, таҥас-сап тигэллэрин таһынан дьиэлэрин-уоттарын хомуйарга эмиэ көмөлөһөллөр.

Бу күннэргэ «Саха волонтердара» хамсааһын хамаандата байыаннай дьайыы кыттыылааҕа Иван Б. дьиэтин-уотун хомуйан, сууйан-сотон биэрдилэр.
Иван соторутааҕыта госпиталга өр сытан эмтэнэн тахсан, дойдутугар кэлбитэ. Байыас сотору кэминэн Приморскай кыраайга чааһыгар төннүөхтээх.

Волонтердар байыас дьиэтигэр туалета алдьаммытын сантехник ыҥыран оҥоттордулар, таҥас куурдар тэрили, күннээҕи туттуллар иһити-хомуоһу атыылаһан биэрдилэр, «Аҕа дойдуну көмүскээччилэр» пуондаларын координаторын кытары Иваҥҥа көмөлөһөллөрүн курдук кэпсэттилэр.

«Иван кэлээскэнэн эрэ сылдьар, доруобуйатын өссө даҕаны өр кэмнээх эмтэниини ааһыахтаах. Кини Жатайга олорор, дьиэтигэр киирэригэр анал пандус оҥоһуллуон наада. Онон уолга тус бэйэтигэр көмөлөһүөн баҕалаахтар баар буоллахтарына «Саха волонтердара» хамсааһын колл-киинигэр билсэллэригэр ыҥырабыт», — дэһэллэр волонтердар.