Саха ырыаһыта Кит Джа быһаҕынан анньыллан балыыһаҕа киирбит

Саха сирин биллэр ырыаһыта Субудай Айыына-Арчылаан Дьулустаан Уола, норуокка биллэринэн Кит Джа (Kit Jah) , быһаҕынан түөскэ анньыллыбыт.

Быһылаан Сунтаар сэлиэнньэтигэр арендаланар ыалдьыт дьиэтигэр буолбут. Билигин ырыаһыт оройуон киинин балыыһатыгар сытар.

Полицияҕа буолбут түбэлтэ туһунан иһитиннэрии кулун тутар 25 күнүгэр сарсыарда 5:00 чаас саҕана киирбит. ИДьМ үлэһиттэрэ дьиэҕэ сылдьыбыт 33-тэн 39-гар диэри саастаах түөрт олохтоох эдэр дьон лиичинэстэрин быһаарбыттар. Барыллаан быһаарыынан, ырыаһыты 34 саастаах эр киһи быһаҕынан хас да төгүл анньыбыт. Хампаанньа арыгы испиттэрэ билиннэ.

«Олохтоох 34 саастаах эр киһи бу иннинэ урут хаста да холуобунай эппиэтинэскэ тардыллыбыта. Кини 33 саастаах эр киһини бааһырдыбытыгар уорбаланар. Эмсэҕэлээбит ырыаһыты балыыһаҕа киллэрэн сөптөөх мэдиссиинэ көмөтө оҥоһуллар»,-диэн Саха сиринээҕи ИДьМ пресс-сулууспата СИА-ҕа иһитиннэрдэ.