Сахаайа Корякина: ««Азия оҕолоро» өссө үрдүк чыпчаалларга талаһарга көҕүлүүр»

«Азия оҕолоро» VIII норуоттар икки ардыларынааҕы оонньууларга оҕолорбут самбо көрүҥэр күрэхтэһии түмүгүнэн түөрт мэтээли ылары ситистилэр.

Саха сиригэр төрдүс мэтээли аҕалбыт Сахаайа Корякина буолар. Кини бүгүҥҥү кыайыытын туһунан санаатын маннык үллэһиннэ:

— «Азия оҕолоро» VIII норуоттар икки ардыларынааҕы оонньууларга кыттыбыппыттан олус долгуйдум, астынным. Маннык үрдүк таһымнаах күрэхтэһиигэ кыттыы улахан эппиэтинэстээх. Олус ыарахан этэ, ол эрээри санаабын ситистим. Туруоруммут сыалбын ситиһэн мэтээли ыллым. Самбонан уон сыл дьарыктанным, сырам толуйулунна. «Азия оҕолоро» оонньууга ситиһиим миэхэ өссө күүскэ дьарыктанарбын, өссө үрдүк чыпчаалларга талаһарбын көҕүлүүр. Аны Арассыыйа, Европа таһымнаах күрэхтэргэ кыттарга дьулуһуом.