«Сахабулт» сайыны көрсөр…

Ыам ыйын 22 күнүгэр, Ньукуолуҥҥа, Саха сиригэр Сайылык күнэ бэлиэтэнэр. Бу бэлиэ күнү  «Сахабулт» тэрилтэ  Үөһээ Үрдүк Айыыларга махтанан туран бэлиэтиир үгэстээх.

Тэрилтэ салайааччыта Виктор Пермяков уот оттон, арыылаах алаадьынан, үрүҥ сиэлинэн аал уотун аһатан, көрдөһөн, алгыс тылларын эттэ. Салгыы үлэһиттэр самаан сайыны көрсөр, салама ыйыыр сиэригэр-туомугар кытыннылар.

«Сахабулт» салалтата үлэһиттэригэр  самаан сайын саҥа саҕахтары,  саҥаттан саҥа кирбиилэри аҕаларыгар баҕаран туран, махтал тылларын эттилэр. Бастыҥ үлэһиттэргэ Махтал суруктары туттардылар.

Бу күн кус миининэн, алаадьынан үлэһиттэри күндүлээтилэр.  Хабылыктаан, хаамыскалаан, Ньукуолун күнүн киэргэттилэр.