“Сахабулт” үлэһиттэрэ Ойуунускай сутуруотун тигэн түмэлгэ бэлэхтээтилэр

Бу күннэргэ “Манчаары оонньууларынан” сибээстээн, Былатыан Ойуунускай төрөөбүт алааһыгар, балаҕаныгар элбэх киһи тоҕуоруһа, тэрээһин бөҕө ыытылла турар.

Онно “Сахабулт” ААУо генеральнай дириэктэрин солбуйааччы Туйаара Михайлова анаан-минээн кэлэн, Былатыан Ойуунускай аатынан судаарыстыбаннай түмэлгэ генеральнай дириэктэр  э.т. Виктор Пермяков эҕэрдэ суругун кытта Ойуунускай сутуруолаах этэрбэһин үтүгүннэрэн тикпиттэрин бэлэх гынан туттарда. Бу сутуруону Былатыан Ойуунускай 1924 с. ахсынньы 14 күнүгэр РКП (б) III Уобаластааҕы кэмпэриэнсийэ историческай хаартыскатыгар кэтэн олорор эбит.

Биһиги Туйаара Павловнаҕа тахсан, бу сутуруо туһунан кэпсииригэр көрдөстүбүт.

“Норуоппут салайааччыларын үйэтитиэҕиҥ диэн биһиги Бастакы Бэрэсидьиэммит Михаил Ефимович Николаев көҕүлээһинэ этэ. Кини дьаһалынан, бастаан Максим Аммосов куруму этэрбэһин тигэн, Өрөспүүбүлүкэ күнүгэр Хатырыкка баар судаарыстыбаннай түмэлгэ бэлэхтээбиппит”.

Оттон бу “Манчаары оонньууларыгар” сөп түбэһиннэрэн, үлэһиттэр  Чөркөөххө баар судаарыстыбаннай түмэлгэ Былатыан Ойуунускай сутуруолаах этэрбэһин тигэн бэлэхтиэҕиҥ диэн  тыл көтөхпүттэр. Түүлээҕи тигэр сыах салайааччыта Августа Александровна Разумова сонно сөбүлэспит. Научнай консультант быһыытынан учуонай Светлана Петрованы ыҥыран сүбэлэппиттэр. Бу сутуруолаах этэрбэһи Ойуунускайга өймөкөөннөр бэлэхтээбиттэр дииллэр эбит. Билигин сутуруо устуоруйатын кытта ойуутун-дьарҕаатын Светлана Петрова хасыһан-дьаныһан үөрэтэ сылдьар.

“Максим Аммосовка да, Былатыан Ойуунускайга да бу атах таҥастарын бэлэхтээбит буолуохтаахтар, — диир Туйаара Павловна. – Бу этэрбэс норуот тапталынан, ытыктабылынан, сырдыкка тардыһар итэҕэлинэн угуттаммыт. Буор кута бөҕө туруктаах, тирэхтээх буоларыгар анаан тикпиттэр. Чиҥ тирэхтээх салайааччы кыраттан иҥнэ-охто сылдьыбат, үлэтэ да оннук киэҥ,  далааһыннаах. Аны норуот тоҕо этэрбэһи бэлэхтиирий? Атаххар сылаас буоллун, доруобай сырыт, биһиги туспутугар кытаат, диэн таптаан-алҕаан туран биэрэр. Онон норуот салайааччытыгар таптала, салайааччы норуотун туһугар үлэлиирэ – бу үтүө ситимнээх олох эргиирэ буолар. Ол сиэринэн 34 саастаах генеральнай дириэктэр э.т. Виктор Пермяков салалтатынан “Сахабулт” тэрилтэ үлэһиттэрэ бу сутуруолаах этэрбэстэри бэйэлэрин хамнастарын суотугар тиктилэр. Устуоруйаҕа хаалар үтүө дьыалаҕа кыттыһалларыттан бэйэлэрэ да астыналлар. Улуу убайдарбытын, салайааччыларбытын үйэтитиигэ киллэрбит кылааппыт биһиэхэ эмиэ тирэх буоллун”.

Чахчы да, Былатыан Ойуунускай салайааччы быһыытынан туох баар сатабыла, ис кыаҕа-күүһэ, өйө-санаата барыта норуотугар туһуламмыта. “Сахабулт” концерн үлэһиттэрэ көҕүлээбит үтүө дьыалалара үүнэр көлүөнэҕэ утумнанан-салҕанан бара туруохтун!