Сахабыт сирин билиҥҥитин, инникитин  туһугар бары бииргэ буолуохпут!

Саха Өрөспүүбүлүкэтин бырабыыталыстыбатын Бэрэссэдээтэлин солбуйааччы Ольга Балабкина бэйэтин этиитигэр Андрей Васильевич Кривошапкин дьылҕата – хотугу киһи хараактырын күүһэ, уйулҕатын ис сырдыга түмүллүүлэрэ,  хайдах биир киһиэхэ педагогу, суруйааччыны, учуонайы уонна дьокутааты  батарыахха сөбүн  холобура диэн чорботон бэлиэтээбитэ.

“Кини олоҕун суола – табаһыт чуумугар төрөөн, үүнэн-сайдан учуутал, суруйааччы, дьокутаат, биир дойдулаахтарын настаабынньыктара буолбут киһи туһунан улахан арамаан суруйарга бэлэм сюжет. Кини ис санаатыгар  бэйэтин норуотун бары үтүө өрүттэрин – үлэни таптааһыны, дьоһуннаах буолууну, өбүгэлэриттэн бэриллибит үгэстэри харыстааһыны итиэннэ дьоҥҥо дириҥ тапталы табатык түмэн иҥэриммитэ ,— диэн ытыктабылын биллэрбитэ. – Андрей Васильевич айымньыларыгар Хоту сир философията — айылҕаҕа харыстабыллаах сыһыан, аҕа саастаахтарга ытыктабыл, төрөөбүт тылы харыстааһын, өбүгэлэри кэриэстээһин – дириҥник сырдатыллар.

Андрей Васильевич бары хотугу норуоттар посолларынан буолар. Кини айымньылара – Арктика уус-уран летопиһа,  хас биир тыл өбүгэлэргэ, айылҕаҕа уонна киһиэхэ  ытыктабылынан илгийэр туундара олоҕун энциклопедията. Хотугу норуоттар күүстэрэ-кыахтара кинилэр  туруктаах духуобунастара, төрөөбүт дойдуларыгар тапталлара буоларын көрдөрдө.

Норуот дьокутаатын быһыытынан Андрей Васильевич Кривошапкин  Хоту сир олохтоохторун интэриэстэрин утумнаахтык туруулаһар. Кини дьаныардаах туруорсууларын түмүгэр көс оскуолалар, хотугу таба иитиитин, төрүт олохтоох норуоттар тылларын тустарынан тыын суолталаах сокуоннар ылыллыбыттара. Кини бэйэтин норуотун дьылҕатын туһунан суруйар эрэ буолбакка, норуоттарын  дьылҕатын  оҥорор, бөҕөргөтөр дьон ахсааннарыгар киирсэр”,— өрөспүүбүлүкэ  бырабыыталыстыбатын Бэрэссэдээтэлин солбуйааччы Ольга Балабкина этиитин итинник үрдүктүк сыаналаан түмүктээтэ.

Литература сайдыытыгар,  нассынаалынастар икки ардыларыгар сөбүлэҥи бөҕөргөтүүгэ уонна  Хоту сир норуоттарын  култуурунай нэһилиэстибэлэрин харыстааһыҥҥа үтүөлэрин билинэн туран, Андрей Васильевич Кривошапкиҥҥа РФ бэрэсидьиэнэ Владимир Путин аатыттан Махтал сурук,  “Или уонна норуоттар доҕордоһууларын бөҕөргөтүү иһин”  СӨ Бочуоттаах бэлиэтэ  туттарылыннылар.

Үөрүүлээх тэрээһин кэмигэр үбүлээри  Ил Түмэн, бырабыыталыстыба, Хоту сир төрүт олохтоох, аҕыйах ахсааннаах норуоттарын ассоциациятын, Суруйааччылар сойуустарын, итиэннэ биир дойдулаахтара Кэбээйи, Эбээн-Бытантай оройуоннарын бэрэстэбиитэллэрэ  эҕэрдэлээтилэр.

Андрей Васильевич Кривошапкин мустубут дьоҥҥо махталын биллэрдэ итиэннэ бу тэрээһини тус бэйэтин бырааһынньыгын быһыытынан буолбакка, уопсай, Хоту сири таптыыр, харыстыыр дьон барыбыт бырааһынньыкпыт буолар диэн  чорботон бэлиэтээтэ.

“Мэлдьи өйөбүлгүт, илии-илиилэрбититтэн ыкса  тутуһан бииргэ инники дьулуһарбыт иһин барҕа махтал!  Төрөөбүт Сахабыт сирин билиҥҥитин, инникитин туһугар салгыы бииргэ буолуохпут. Саха сирин норуоттара, бары хотугу сир олохтоохторо  Арассыыйа Бэрэсидьиэнэ Владимир Путин, Бырабыыталыстыба Бэрэссэдээтэлэ Михаил Мишустин өйөбүллэринэн сарын-сарыннарбытынан өйөһөн инники кэскилбитин  таһаарыылаах үлэбитинэн эрэллээхтик тутарбытыгар эрэнэбин.

Саха Өрөспүүбүлүкэтин бары салайааччыларыгар махтанабын – Михаил Ефимович Николаевка, Вячеслав Анатольевич Штыровка,  Егор Афанасьевич Борисовка, билиҥҥи Ил Дархаммытыгар Айсен Сергеевич Николаевка – төрөөбүт Сахабыт сирин билиҥҥитин, инникитин туһугар бииргэ үлэлээбиппит, үлэлиирбит иһин!” – Саха Өрөспүүбүлүкэтин Бочуоттаах гражданина, норуот суруйааччыта, бөдөҥ судаарыстыбаннай-уопсастыбаннай диэйэтэл Андрей Васильевич Кривошапкин үөрүүлээх тэрээһини түмүктүүр.

           СӨ Ил Дарханын уонна Бырабыыталыстыбатын  пресс-сулууспата.