Сахалыы куттаах Артур Портнягин

Саха сиригэр “Ыллаа-4” бырайыакка үс сырдык хааннаах ырыаһыт ыччат сахалыы таҥнан, өбүгэлэрбит үрүҥ көмүс киэргэллэрин кэтэн сыанаҕа тахсан сахалыы ыллаабытын  көрөөччүлэр сэргии көрсүбүттэрэ. Ити бырайыактан сиэттэрэн, бу ыччаттар үгүс тэрээһиннэргэ, бырайыактарга кытталлар.

Кинилэртэн биирдэстэрэ 17 саастаах Артур Портнягин буолар. Кини салгыы НТВ тэлэбиидэнньэ ханаалыгар “Ты — супер” 9‑с сезонугар кыттан, Женя Трофимов “Самолеты” ырыаны толорбутугар Саха сирин дьоно бары кини туһугар ыалдьыбыта…

Дьиэ кэргэн дьолун билии

— Артур, эйигин игирэҥ аҥаара Богданы кытары иитэ ылбыттарыгар дьиэ кэргэн диэн хайдах курдук күндүтүн биллэҕиҥ.

— Оннук. Дьиэ кэргэн дьоло диэни Эдьигээҥҥэ Гульнара Портнягина диэн үтүө санаалаах, мааны майгылаах Далбар хотуҥҥа кэлэн билбиппит. Бу дьиэ кэргэҥҥэ аҕалара суоҕа, ол гынан баран ийэбит Гульнара Алексеевна аҕаны солбуйан ииппитэ. Биһиги ийэбитигэр, аймах билэ дьоммутугар, биир дойдулаахтарбытыгар махталбыт муҥура суох.

— Эн Эдьигээҥҥэ улааппытыҥ дуо?

— 1–3‑с кылаастарга Мохсоҕоллоохтооҕу Оҕо дьиэтигэр иитиллибиппит. Онтон 3‑с кылаастан 7‑с кылааска диэри Эдьигээҥҥэ улааппытым, манна үөрэммитим. Волейболга уонна успуорка чугаспын билэммин, 8‑с кылаастан Нам улууһугар кэлбитим.

Артур Портнягин кыттыбыт “Ты – супер!” куонкурус дьүүллүүр сүбэтигэр Алсу, Диана Арбенина, Игорь Крутой уонна Стас Ярушин курдук Арассыыйа биллэр артыыстара үлэлээбиттэрэ.

— Сахалыы маннык ыраастык бастакыттан саҥараҕын дуо?

— Биһигини Оҕо дьиэтиттэн ылаат да, ийэбит сыыйа-баайа саха тылыгар, сахалыы саҥарарга үөрэтэн барбыта. Онон 8‑с кылаастан сахалыы ыарырҕаппакка кэпсэтэр буолбутум.

— Эн дэгиттэр талааннаах эбиккин.

— Эдьигээҥҥэ кэлбиппитигэр ийэм биһиги ыллыырбытын билэр этэ. 9 сааспыттан ыллаабытым. Биһигини наар араас кэнсиэркэ, тэрээһиҥҥэ ыҥыран ыллаталлара. Ол гынан баран, ханнык да мусукаалынай оскуолаҕа үөрэммэтэҕим. Бэйэтэ кэмэ кэлэн быһыылаах, ыллыыр буолан барбытым.

— Ордук хайдах ырыалары толороргун сөбүлүүгүн?

— Билигин нууччалыы ыллыыбын. Ол гынан баран, сахалыы ырыалары поп-истиилинэн толорорбун олус сөбүлүүбүн.

— Оттон Богдан тугунан дьарыктанарый?

— Кини хотугу многоборьенан дьарыктанар уонна бу көрүҥҥэ успуорт маастара, Арассыыйа чөмпүйүөнэ, СӨ ыччат сүүмэрдэммит састаабыгар баарбыт.

— Волейболга СӨ ыччат сүүмэрдэммит хамаандатыгар хайдах киирбиккиний?

— Намҥа кэлэн баран, Н. С. Тимофеев аатынан олимпийскай эрэллэр өрөспүүбүлүкэтээҕи успуорт оскуолаларыгар киирбитим. Бу оскуола Саха сиригэр оҕо-ыччат успуордун сайыннарарга, эдэр спортсменнары элбэтэргэ уонна успуорт инники кэскиллэрин бэлэмнииргэ аналлаах. Манна волейболга СӨ сүүмэрдэммит ыччат хамаандатыгар ылыллыбытым.

“Ты — супер” шоуга ыҥырыллан кыттыы

— Эйигин өрөспүүбүлүкэ олохтоохторо “Ыллаа‑4” бырайыакка аан бастаан көрбүттэрэ уонна олус сэргээбиттэрэ.

— Бу бырайыакка Евгения Шамаева уонна Баай Баас Трофимов буолан кыттыбыппыт. Үһүөн уруккуттан ылланар, дьон-сэргэ билэр сахалыы матыыптаах ырыатын толорбуппут.

— Бырайыак да кэннэ ситимҥитин быспаккыт буолуо?

— Мин олус элбэх доҕордоохпун. Ону сэргэ, бу триобытын кытта истиҥ сыһыаннаахпыт, билсэ-көрсө сылдьабыт.

— Дьэ, оттон Москваҕа НТВ тэлэбиидэнньэ ханаалыгар “Ты — супер” 9‑с сезонугар кыттан баран, эйиэхэ туох саҥа санаалар киирдилэр?

— Туох да диэбит иһин, сыанаҕа ыллыырга үөрүйэх олус суолталааҕын өйдөөтүм. Ону сэргэ кыбыстыбакка, ырыаны бэйэҥ баҕарарыҥ курдук ылынан толоруохтааххын.

“Алаадьыбытынан сири-уоту, дойдуну алҕаабыппыт”

— Төһө долгуйбуккунуй, Артур?

— Долгуйбатаҕым. Биһиэхэ, Саха сиригэр талааннаах дьон баалларын көрдөрөр сыаллаах-соруктаах этим. Биллэрин курдук, бу бырайыак тулаайах эбэтэр ыалга, интэринээккэ иитиллэр талааннаах оҕолорго ананар. Мин бу куонкуруска кыттарга сыл аҥаара кэриэтэ бэлэмнэммитим. Федеральнай тэлэбиидэнньэҕэ куонкурустарга тахсар бэһис киһигин диэбиттэрэ. Москваҕа ийэбин кытары кэлбитим. Сиэр-туом быһыытынан, сахалыы алаадьыбытынан сири-уоту, дойдуну алҕаабыппыт. Саха сирин култууратын көрдөрө кэлбит киһи быһыытынан, көҥүллээтэхтэринэ сахалыы таҥастаах тахсан ыллыам дии санаабытым.

Манна кэлэммин элбэх биллэр-көстөр дьону кытары билсибитим. Миигин өйөөбүт биир дойдулаахтарбар уонна атын да дойду дьонугар олус махтанабын. Кыттыбытым кэннэ дьүүллүүр сүбэ, ордук Стас Ярушин, сүбэ-ама биэрбиттэрэ.

Мин, уопсайынан, ис турукпун аһаҕастык соччо көрдөрбөппүн. Тоҕо диэтэххэ, миигин күүстээх санаалаах саха уоланын курдук көрө үөрэммиттэр. Онон хайдах ыллаабыппын, туох алҕастар тахсыбыттарын кэпсии, бэйэбин көмүскэнэ сатаабатаҕым. Дьиэбэр кэлэн баран, соҕотоҕун эрэ буолуохпун баҕарбыт кэмнэрдээх этим.

— Билигин тугунан дьарыктанаҕын?

— Дьокуускай куорат 33 №-дээх оскуолатыгар 11‑с кылааска үөрэнэбин. Ыллыыбын, кэнсиэртэргэ кыттабын уонна, биллэн турар, волейболунан дьарыктанабын.

— Инникитин бэйэҕин ханнык эйгэҕэ тургутан көрөн былааннааххын?

— Бэйэм кэрэхсиир, сэҥээрэр эйгэбэр барытыгар сайдыахпын баҕарабын.

ХААРТЫСКАЛАР: А.ПОРТНЯГИН ТУС АРХЫЫБЫТТАН.