Сахалыы саҥаны сурукка кубулутар «бот» баар буолла

Үөрүүлээх сонун! Ийэ тыл күнүгэр сахалыы саҥаны сурукка кубулутар телеграм-бот оҥоһуллан таҕыста. Бу «Саҥа-Сурук» бот Оҥоһуу өй көмөтүнэн үлэлиир. 

Национальнай бибилэтиэкэ былырыыҥҥыттан сахалыы Оҥоһуу өйү оҥорорго ылсыбыта. Ийэ тыл күнүгэр Опера, балет тыйаатырыгар буолбут дьоро киэһэҕэ култуура волонтердара кэрийэ сылдьан, дьон саҥатын устубуттара. Маны тэҥэ, «бибилэтиэкэ саайтыгар саҥаҕын хааллар, сахалыы Оҥоһуу өй оҥоһулларыгар көмөлөс» диэн ыҥырыы баар этэ.

Ол онно хомуллубут саҥа-иҥэ көмөтүнэн, бу телеграм-бот оҥоһуллан таҕыста. Бырайыакка Национальнай бибилэтиэкэ, Арктикатааҕы култуура, ускуустуба института уонна «Сбер» кыттыһан үлэлээтилэр.

Бу «Саҥа-Сурук» бот тугу сатыырый? «Телеграм» сыһыарыыга киирэн, «Саҥа-Сурук» диэн суруйан, көрдөтөн, булан ылан баран, сахалыы саҥардаххытына, ону кини тиэкискэ кубулутар.

Маннык ньыма ордук суруналыыстарга туһалаах эбит. Интервью ыларгар диктофоҥҥа 1 чаас устубуккун 3-4 чаас устата сурукка тиһэҕин, бу ордук сылаалаах, олох интэриэһинэйэ суох, этэргэ дылы, хара үлэ буолар.

Мин тута киирэн, боруобалаан көрдүм. Көннөрү саҥарбыппын бэрт үчүгэйдик суруйда. Онтон диктофоҥҥа уһуллубут саҥаны элбэх сыыһалаах суруйан таһаарда. Ол да буоллар, бу бот хара үлэни биллэ чэпчэтэр эбит.

Василий Борисов, Национальнай бибилэтиэкэ дириэктэрин солбуйааччы:

— Бу ботка Оҥоһуу өй үлэлиир. 60 мүнүүтэҕэ диэри уһуннаах саҥаны тиэкискэ кубулутуон сөп. Тута микрофоҥҥа да саҥарыахха, диктофоҥҥа урут устуллубуту да угуохха сөп.

— Ити сыыһалара аҕыйаан, тупсан, сайдан иһиэ дуу, итинник хаалар дуу?

— Национальнай бибилэтиэкэ саайтыгар «Истии» бырайыак (voice.nlrs) баар. Бу манна киирэн, дьон сахалыы саҥаны хаалларар. Бу саҥарыллыбыт саҥаны туһанан, Оҥоһуу өй «телеграм-боту» үлэлэтэр. Төһөнөн элбэх киһи саҥатын хаалларар да, соччонон сахалыы тылын саппааһа эбиллэн, тупсан, сайдан иһиэҕэ. Бот сыыһата да аҕыйыаҕа. Үлэ быыстала суох бара турар. Хас биирдии куолас оҥоһуу өй чочулларыгар, сайдарыгар төһүү күүс буолар.

Сороҕор «Оҥоһуу өй мин куоласпын ылан, тугу эрэ гыныаҕы» диэн куттаналлар. Ким, хаһан саҥарбыта биллибэт буоллаҕа, Оҥоһуу өй куолаһы туһаммат. Кини хайдах сөпкө саҥарарга үөрэнэр. Уһуллубут саҥа бэрэбиэркэни ааһан эрэ баран, туһаныллар. Билиҥҥитэ 12-13 тыһыынча этии ааҕылынна. Сахалыы саҥарар Оҥоһуу өй тылын саппааһа хаҥыан наада, оччоҕо эрэ сыыспакка саҥарар, суруйар буолуоҕа. Онон биһиги саайтпытыгар киирэн, бэриллибит тиэкиһи ааҕан биэрэн, саҥаҕытын хааллараргытыгар ыҥырабын.

«Саҥа-Сурук» телеграм-бот буор-босхо үлэлиир, ким баҕарар киирэн, туһаныан сөп. Интэриниэт, сыыппара эйгэтигэр сахалыы саҥа, сурук-бичик эбиллэ, сайда турдун!