Сахалыы сериаллар саҥалыы тыынынан тахсыахтара

Биир идэлээхтэрбит илэ харахтарынан көрөн, эт кулгаахтарынан истэн элбэх саҥаны биллилэр. Уон күн устата аан дойдуга аатырбыт, элбэх киинэ уһуллубут «Ленфильм» киинэ устуудьуйатыгар сылдьан, дойду биллиилээх, ааттаах-суоллаах кинодраматургтарын, сценаристарын, оператордарын кытта алтыстылар, уопут атастастылар. Маны таһынан, Россия биир бастыҥ ханаалыгар көстүөхтээх саҥа сериал уһулла турарыгар түбэһэн, элбэҕи биллилэр-көрдүлэр.

Мантан ыла, сериал сулууспатыгар саҥа сүүрээн киирэн, сүргэлэрэ көтөҕүллэн, айар аартыктара кэҥээн, өссө саҥа сериаллары устан саха дьонун-сэргэтин үөрдүөхтэрэ диэн бүк эрэнэбит.

Бүгүҥҥү күҥҥэ саха киинэтэ аар саарга аатырда, суон сурахтанна. Ол курдук, биһиги үлэһиттэрбит устубут саҥа сериаллара эмиэ дойду таһымыгар көрдөрүллэр буоллар диэн баҕа санаалаахпыт. Ол туоһутунан былырыын «Харчы.Иэстэбил» сериал «ТЭФИ регион» Бүтүн Россиятааҕы телевизионнай наҕарааданы ылбыта буолар.

Биир нэдиэлэнэн, тохсунньу 27 күнүттэн, «САХА» НКИХ ханаалыгар «Уот Дьулустаан» диэн саҥа сериалы көрөөрүҥ диэн ыҥырабыт!
Сценарист: Катерина Григорьева — Кэрэмэс Сыдьаай
Режиссер: Елена Эверстова

Родион Кривогорницын