Салгыы
Сахамин Афанасьев: «Туризм сайдыыта — тымныыга,  култуураҕа, айылҕа кэрэ көстүүлэригэр»

Сахамин Афанасьев: «Туризм сайдыыта — тымныыга,  култуураҕа, айылҕа кэрэ көстүүлэригэр»

20.12.2022, 19:36
Бөлөххө киир:

Ил Дархан Айсен Николаев туризмы сайыннарыыга кэккэ сорудахтаах этиитин үгүс дьон биһирии иһиттэ.

Ил Түмэн Халыма-Индигиир уокуругуттан норуот дьокутаата Сахамин Афанасьев туризм салаата сайдыытыгар сыһыаннаах санаатын маннык тиэртэ:

—  Аҕа баһылык Айсен Николаев Анал этиитигэр  туризм биир сүрүн хайысхатыгар — ыалдьыттары көрсүүгэ биир кэлим стандарты киллэриигэ чопчу соруктары туруорда. Кини РФ экэнэмиичэскэй сайдыыга миниистирэ Максим Решетниковы кытта  Саха сиригэр туризмы сайыннарыыга дириҥ ис хоһоонноох кэпсэтиини ыыппытын түмүгэр, «сайдыы саҕаҕа киэҥ» диэн бэлиэтээтэ.  Онон туристическай инфраструктураны сайыннарыыга, ол эбэтэр  гостиницалары тутууга, аэропортары саҥардыыга, турмаршруттар ахсааннарын элбэтиигэ улахан болҕомто ууруллара наадаалаах.  Ил Дархан өрөспүүбүлүкэҕэ кэлэр турист ахсаана 20 тыһыынчаттан 250 тыһыынча киһиэхэ диэри улаатар кыахтааҕын бэлиэтээн туран, «сайдыахтаах туристическай  тосхоллору  үс хайысхаҕа  — тымныыга,  култуураҕа, айылҕа кэрэ көстүүлэригэр олоҕуран олоххо киллэриҥ» диэн соруйда.  Маныаха бу хайысхалары бүгүҥҥү күҥҥэ олоххо киллэрбит улууһунан  Өймөкөөн оройуона буолар. Өймөкөөн Тымныы полюһун быһыытынан аан дойдуга тиийэ билиннэ. Бу улууска туризмы сайыннарыыны бу этиллибит хайысхаларынан үрдүк таһымнаахтык ыыта олороллор диэн бэлиэтиибин. Онон, мин санаабар, Аҕа баһылык эппитин учуоттаан, СӨ Предпринимательствоҕа уонна туризм дьыалаларыгар министиэристибэтэ уонна Өймөкөөн улууһун дьаһалтата туризмҥа сыһыаннаах чопчу бырагыраама оҥорон үлэлиэхтээхтэр. Өрөспүүбүлүкэ  туризм сайдыытыгар  67 мөлүйүөн солкуобайы  федеральнай үбүлээһин быһыытынан ылбыт буоллаҕына,  бу үптэн сороҕо Өймөкөөн улууһугар туристическай инфраструктураны сайыннарыыга ананыан наада. 

Ил Дархан «айылҕа кэрэ көстүүтүн, тымныыбытын туһанан, туризм  сайыннаҕына, биһиги улуустарбыт  улаханнык сайдыахтара, дьоҥҥо-сэргэҕэ үлэ миэстэтэ да  тахсыа,  олохтоох дьоҥҥо дохуот да киириэ этэ» диэн бэрт сөпкө бэлиэтээтэ.  

 Ил Дархан Анал этиитин биһириибин уонна сэргиибин. Бу эппитин толорор инниттэн саҥа сылтан бырабыыталыстыбаны кытта туһааннаах министиэристибэлэр үлэлэрин саҕалыахтарын наада.

Лента
Салгыы
6 февраля
  • -44°C
  • Ощущается: -51°Влажность: 66% Скорость ветра: 2 м/с

Сообщить об опечатке

Текст, который будет отправлен нашим редакторам: