Хаартыска: ааптар тиксэриитэ
Кулун тутар 20-23 күннэригэр Дьокуускайга “Саханефтегазсбыт” АУо 19 салаатын дириэктэрдэрин 3-с сийиэһэ ыытылла турар.“Саханефтегазсбыт” АУо генеральнай дириэктэрэ, СӨ Судаарыстыбаннай Мунньаҕын норуодунай дьокутаата Виктор Лебедев киэҥ хабааннаах тэрээһин кыттыылаахтарын эҕэрдэлииригэр ньиэп базатын салайааччылара 2022 сылга хас биирдии салаа үлэтин түмүгэр таһааралларыгар уонна дьоһуннаах этиилэри киллэрэр, биир идэлээхтэрин кытары уопут атастаһар кыаҕы туһаналларыгар ыҥырда.
Үс күннээҕи сийиэс бырагырааматынан, хас биирдии салаа дириэктэрэ биир идэлээхтэригэр үлэтин отчуоттуур уонна 2021 сыл түмүктэрин кытары тэҥниир, анаалыстыыр. Ону таһынан, салаа салайар састаабыгар билиҥҥи күҥҥэ наадалаах тиэмэлэргэ экспердэр лиэксийэ ааҕыахтара. Холобур, ньиэп бородууктатын учуоттааһын уонна харыстааһын, тутуу уонна олохтоох өрөмүөн, ньиэп базаларын саҥардыы уо.д.а. боппуруостар дьүүллэһиллэллэр. Маны сэргэ, дириэктэрдэр салаалар үлэлэригэр сыһыаннаах тирээн турар боппуруостары дьүүллэһиэхтэрин, хампаанньа салалтатыттан ханнык баҕарар ыйытыкка хоруй ылыахтарын, бэл, былааҥҥа уларытыылары киллэриэхтэрин сөп.
Кулун тутар 23 күнүгэр, сийиэс бүтэһик күнүгэр, сүрүн офиска салаалар дириэктэрдэрэ уонна сүрүн офис отделларын начаалынньыктара кыттыылаах “төгүрүк остуол” ыытыллар.
Салҕыы, кулун тутар 24-29 күннэригэр, “Саханефтегазсбыт” АУо салааларын дириэктэрдэрэ СӨ Ил Дарханын иһинэн инновационнай менеджмент үрдүкү оскуолатыгар салайар компетенциялары сайыннарарга идэни үрдэтэр кууруска сылдьыахтара.
“Биһиги үлэһиттэрбит идэлэрин үрдэтэллэригэр ураты болҕомтобутун уурабыт уонна салаалар дириэктэрдэрин сийиэһин кэнниттэн үлэһиттэрбит идэҕэ таһымнарын үрдэтэргэ хайысхаланар атын да дьаһаллар былааннаналлар”, — диэн Виктор Лебедев бэлиэтээн эттэ.
Санатан эттэххэ, ааспыт сыл сэтинньитигэр “Саханефтегазсбыт” сүрүн офиһыгар бэйэлэрин салааларын сүрүн инженердэрин ыҥырбыттара. Кинилэр манна аттестацияны ааспыттара уонна Москваттан, Санкт Петербуртан ыҥырыллан кэлбит экспертэргэ үөрэнэн, бырамыысыланнай, баһаарынай уонна экологияҕа куттал суох буолуутугар идэлэрин үрдэппиттэрэ. Ону сэргэ, тэрилтэ салаалар кылаабынай бухгалтердарыгар ньиэп бородууктатын учуоттуурга үөрэтэр сэминээри тэрийбитэ.
Яна БАЙГОЖАЕВА
Сороҕор туустаах оҕурсуну сиэххин баҕаран кэлэҕин дии. Дьиҥэр, түргэнник оҥоһуллар ньыма баар. Бу ырысыапка уксуус…
Юрий Слепцов, Нам улууһун баһылыга: --Саха Өрөспүүбүлүкэтин Төрүт Сокуонугар киирэр уларытыылары биһириибин. Чуолаан Төрүт Сокуоҥҥа…
Бу нэдиэлэҕэ СӨ Тыатын хаһаайыстыбатын уонна ас-үөл бэлиитикэтин министиэристибэтэ “Саха сирин балыга” өрөспүүбүлүкэтээҕи уон бэһис…
Сергей Сивцев, Ил Түмэн дьокутаата: -Ил Түмэн 14 пленарнай мунньаҕар Саха Өрөспүүбүлүкэтин Төрүт Сокуонугар уларытыылары…
Бүгүн, алтынньы 22 күнүгэр, Саха Өрөспүүбүлүкэтин Судаарыстыбаннай Мунньаҕын (Ил Түмэнин) күһүҥҥү бастакы уон төрдүс ыҥырыылаах…
РФ Бэрэсидьиэнин иһинэн история өйдөбүнньүгүн национальнай киинэ уонна “Биир ньыгыл Арассыыйа” баартыйаны өйүүр Киин сэбиэт…